„მსურველთა კოალიციის“ ლიდერების შეხვედრის შემდეგ პოლონეთის პრემიერ-მინისტრმა დონალდ ტუსკმა ჟურნალისტებთან უკრაინის უსაფრთხოების გარანტიებთან დაკავშირებით მისი ქვეყნის როლზე ისაუბრა.

ჟურნალისტების კითხვაზე პასუხის გაცემისას დონალდ ტუსკმა აღნიშნა, რომ უკრაინის ტერიტორიაზე პოლონური ჯარების განლაგებასთან დაკავშირებით მისი მთავრობის პოზიცია უცვლელი რჩება.

„პოლონეთი, როგორც არაერთხელ გავუსვით ხაზი, არ გეგმავს ჯარების გაგზავნას უკრაინაში. ასევე ომის დასრულების შემდეგაც“, - განაცხადა მან.

თუმცა, ტუსკის თქმით, მხარდაჭერა, სხვა საკითხებთან ერთად, ლოგისტიკის კოორდინაციასაც შეეხება.

„ჩვენ ლოგისტიკაზე ვართ პასუხისმგებელნი. ცნობილია, რომ ეს უდიდესი ცენტრი პოლონეთში მდებარეობს, ეს არის ადგილი, სადაც უკრაინისთვის დახმარების ორგანიზება ხდება. და ეს საკმარისი, თუ არა განსაკუთრებული მნიშვნელობის ამოცანაა“, - ხაზი გაუსვა პოლონეთის პრემიერ-მინისტრმა.

ამასთან, ტუსკის თქმით, 4 სექტემბერს გამართული მოლაპარაკებები ორ ნაწილად დაიყო. პირველ ნაწილში, როგორც მთავრობის მეთაურმა განმარტა, უკრაინის უსაფრთხოების აღსადგენად ქვეყნების პასუხისმგებლობის განაწილება განიხილეს. ტუსკის თქმით, ევროპული კოალიციის არცერთი პარტნიორი არ ეწინააღმდეგება პოლონეთის გადაწყვეტილებას.

„რა თქმა უნდა, ყველა მიესალმება პოლონეთის ამ ფორმას უკრაინის დასახმარებლად“, - ხაზგასმით აღნიშნა მან.

„შეხვედრის მეორე ნაწილი პრეზიდენტ ტრამპთან საუბარი იყო. ჩვენ ვისაუბრეთ იმაზე, თუ როგორ შეგვეძლო პუტინის გონს მოყვანა“, - დასძინა ტუსკმა.

პრემიერ-მინისტრმა აღნიშნა, რომ „არავინ მალავდა“ იმედგაცრუებას „შედეგების არარსებობის გამო, ევროპული ქვეყნებისა და აშშ-ის პრეზიდენტის ძალისხმევის მიუხედავად“.

ინფორმაციისთვის, საფრანგეთის პრეზიდენტის ემანუელ მაკრონის განცხადებით, „მსურველთა კოალიციის“ ფარგლებში 26 ქვეყანამ გამოთქვა მზადყოფნა, გაგზავნოს ჯარები უკრაინაში, ან უზრუნველყოს გარკვეული რესურსები ასეთი მისიის მხარდასაჭერად.

მისივე თქმით, აშშ-ის წვლილი „მსურველთა კოალიციაში“ მომდევნო კვირებში განისაზღვრება პრეზიდენტ დონალდ ტრამპთან შეთანხმებით.