პოლონეთის საგარეო საქმეთა მინისტრმა რადოსლავ სიკორსკიმ უპასუხა უნგრეთის პრემიერ-მინისტრის ვიქტორ ორბანის განცხადებას, რომელმაც ოფიციალურად დაგმო რუსული დრონების პოლონეთში შეჭრა და შემდეგ შეაქო საკუთარი პოლიტიკა რუსეთის აგრესიის მიმართ.

ორბანმა X-ზე გამოქვეყნებულ პოსტში ოფიციალურად გამოხატა სოლიდარობა პოლონეთის მიმართ რუსეთის დრონების შეჭრის გამო და შემდეგ განაცხადა, რომ ინციდენტმა დაამტკიცა უნგრეთის პოლიტიკის „სისწორე“ რუსეთ-უკრაინის ომთან დაკავშირებით.

ორბანის ამ განცხადებას სოციალურ ქსელში პოლონეთის საგარეო საქმეთა მინისტრი რადოსლავ სიკორსკი გამოეხმაურა. 

„არა, ვიქტორ. ეს ინციდენტი ადასტურებს, რომ თქვენ უნდა გადადგათ ნაბიჯი და დაგმოთ რუსული აგრესია. გთხოვთ, განბლოკოთ ევროკავშირის თავდაცვისთვის განკუთვნილი სახსრების გაცემა, დაამტკიცოთ უფრო მკაცრი სანქციები აგრესორის მიმართ და მოხსნათ ვეტო უკრაინის ევროკავშირში გაწევრიანების შესახებ მოლაპარაკებების დაწყებაზე“, - დაწერა მან. 

No, Victor. The incident proves you should get off the fence and condemn Russian aggression. We ask you to unblock the disbursement of EU funds for defence, approve tougher sanctions on the aggressor and withdraw your veto on starting Ukraine's EU accession negotiations.

— Radosław Sikorski 🇵🇱🇪🇺 (@sikorskiradek) September 10, 2025