საქართველოს ოლიმპიური კომიტეტი საკუთარ განცხადებას განმარტავს
![](https://newshub.ge/uploads/files/2024/07/24/107852/gantskhadeba_w_h.jpeg)
საქართველოს ოლიმპიური კომიტეტი განმარტებას აკეთებს 22 ივლის გაკეთებულ განცხადებასთან დაკავშირებით, რომელიც ოლიმპიური რეკვიზიტების უნებართვო გამოყენების აღკვეთას შეეხებოდა.
როგორც ოლიმპიური კომიტეტის Facebook გვერდზე ვკითხულობთ, აღნიშნული განცხადება ემსახურებოდა საზოგადოების ინფორმირებას, რომ ოლიმპიური რეკვიზიტების გამოყენება მოგების მიღების, კომერციული ან სარეკლამო მიზნებისთვის, საჭიროებს საქართველოს ეროვნული ოლიმპიური კომიტეტის ნებართვას.
ოლიმპიური კომიტეტი ხაზგასმით აღნიშნავს, რომ განცხადება არ ეხება ოლიმპიური რეკვიზიტების გამოყენებას პირადი დანიშნულებით ან მედია საშუალებების მიერ საინფორმაციო მიზნებით.
ცნობისთვის, ოლიმპიური კომიტეტის ზემოაღნიშნულ განცხადებაში ნათქვამი იყო, რომ ყველა უფლება ნებისმიერ ოლიმპიურ რეკვიზიტზე (ოლიმპიური სიმბოლო, დროშა, დევიზი, ჰიმნი და აღნიშვნები (რაც მოიცავს, მაგრამ არ შემოიფარგლება „ოლიმპიური თამაშებით," „ოლიმპიადის თამაშებით" და ა.შ.), ნიშნები, ემბლემები, დროშები და ჩირაღდნები) და მათ გამოყენებაზე, ექსკლუზიურად ეკუთვნის საქართველოს ოლიმპიურ კომიტეტს და არაუფლებამოსილი პირების მხრიდან უკანონო მოქმედებები აღიკვეთებოდა.
„როგორც საზოგადოებისათვის ცნობილია, 2024 წლის ზაფხულის ოლიმპიური თამაშები, 2024 წლის 26 ივლისიდან 11 აგვისტომდე პერიოდში, ჩატარდება საფრანგეთის დედაქალაქ პარიზში.
ოლიმპიადის მოახლოვებასთან ერთად, გვსურს, გავავრცელოთ წინამდებარე საჯარო მოწოდება ოლიმპიური რეკვიზიტების უნებართვო გამოყენების შემთხვევაში, კანონმდებლობით გათვალისწინებულ ზომებს მიმართავდნენ.
„ოლიმპიური თამაშები წარმოადგენს საერთაშორისო ოლიმპიური კომიტეტის (სოკ-ი), როგორც ოლიმპიური მოძრაობის წამყვანი ხელმძღვანელი ორგანოს ექსკლუზიურ საკუთრებას, რომელიც ყოველგვარი შეზღუდვის გარეშე ფლობს მასთან დაკავშირებულ ყველა უფლებას, რაც ითვალისწინებს ნებისმიერი არსებული ან მომავალში შემუშავებული ფორმით და საშუალებით მათ ორგანიზების, ჩატარების, მართვის, მაუწყებლობის, ჩაწერის, წარმომადგენლობის, რეპროდუქციის და გავრცელების უფლებებს. შესაბამისად, ყველა უფლება ნებისმიერ ოლიმპიურ რეკვიზიტზე (ოლიმპიური სიმბოლო, დროშა, დევიზი, ჰიმნი და აღნიშვნები (რაც მოიცავს, მაგრამ არ შემოიფარგლება „ოლიმპიური თამაშებით," „ოლიმპიადის თამაშებით" და ა.შ.), ნიშნები, ემბლემები, დროშები და ჩირაღდნები) და მათ გამოყენებაზე, ეკუთვნის ექსკლუზიურად სოკ-ს, რაც მოიცავს მაგრამ არ შემოიფარგლება მათი გამოყენებით ნებისმიერი მოგების მიღების, კომერციული და სარეკლამო მიზნებით.
ააიპ საქართველოს ეროვნული ოლიმპიური კომიტეტი (სეოკ-ი), რომელიც საქართველოს ტერიტორიაზე წარმოადგენს სოკ-ს, აქტიურ მონიტორინგს უწევს და აკონტროლებს ოლიმპიური ღონისძიებების და/ან მონაწილეების შესახებ და მათთან დაკავშირებით ნებისმიერი საშუალებითა და ფორმით (იქნება ეს ზეპირად თუ წერილობით) ინფორმაციის გავრცელებას და/ან, შეუზღუდავად, ოლიმპიური სიმბოლოების, ოლიმპიური თამაშების ემბლემების, პიქტოგრამების, გრაფიკული გამოსახულებების, ოლიმპიური ნაკრებების ნებისმიერი ემბლემის და/ან ლოგოს, სიტყვების („ოლიმპიური", „ოლიმპიადა", „ოლიმპიური თამაშები" და ა.შ.), მასპინძელი ქალაქების სახელების, ოლიმპიური ღონისძიებების და/ან მონაწილეების ლოგოს, დროშის, გამოსახულების, სახელის, სპორტული ტიტულის, წლების, სავაჭრო ნიშნების და/ან შესაბამისი კანონმდებლობით და/ან სხვაგვარი ფორმით დაცული სასაქონლო ნიშნების, დასახელებების, დევიზების და/ან ნებისმიერი სხვა სახის სიმბოლოს, გამოსახულების, ნიმუშის, სიტყვის, გამოთქმის, გამონათქვამის და ა.შ. გამოყენებას, მათ შორის, შეუზღუდავად, ნებისმიერ პირდაპირ და/ან არაპირდაპირ სარეკლამო/მარკეტინგულ აქტივობას, პოპულარიზაციის ნებისმიერ ფორმას, მაგალითად, სოციალურ მედიასა და სოციალურ ქსელში, ბილბორდებზე, ტელევიზიით, რადიოთი, ბეჭდვით თუ ონლაინ სივრცეებში, შეტყობინებებს/აქციებს (მიუხედავად იმისა იქნება ფასიანი თუ უფასო), ტრადიციულ რეკლამას/PR-ს (პირადი გამოსვლებისა და პრეს რელიზების ჩათვლით), მათ შორის, ნებისმიერ პროდუქტზე/სავაჭრო სივრცეში და ა.შ.
ამდენად, გთხოვთ, გაითვალისწინოთ, რომ ნებისმიერი პირის მხრიდან ნებისმიერი ზემოაღნიშნული აქტივობა, მათ შორის, ერთმნიშვნელოვნად, ოლიმპიური რეკვიზიტების გამოყენება დაიშვება მხოლოდ
სოკ-ის პრინციპების/წესების შესაბამისად და აღნიშნულის წინასწარ, სეოკ-ისგან ნებართვის მიღების და მასთან შეთანხმების გზით.
სეოკ-ი იმედს იტოვებს, რომ წინამდებარე განცხადების გამოქვეყნებით, ინფორმაცია მიეწოდებათ სათანადო პირებს და ისინი იმოქმედებენ სეოკ-ის ნებართვის შესაბამისად ან/და განცხადების გაცნობიდან უმოკლეს ვადებში, უზრუნველყოფენ უკანონო მოქმედებების აღკვეთას.
ამასთან, სეოკ-ი განაგრძობს აქტიური მონიტორინგს და დარღვევების გამოვლენის შემთხვევაში, დაუყოვნებლივ მიმართავს კანონმდებლობით გათვალისწინებულ ზომებს. კერძოდ, დამრღვევ პირებს სასამართლოს წესით აუკრძალავს ნებისმიერ უნებართვო აქტივობას და მოითხოვს დამრღვევი პირების მიერ უნებართვო აქტივობებით მიღებულ შემოსავალს/მოგებას. ამასთან, თუ ამგვარი შემოსავალი/მოგება აღემატება კანონმდებლობით განსაზღვრულ მოცულობას, შესაძლებელია დადგეს სისხლის-სამართლებრივი პასუხისმგებლობის საკითხიც“, - ნათქვამი იყო განცხადებაში.
როგორც საქართველოს ოლიმპიურ კომიტეტში აღნიშნავენ, ოლიმპიური რეკვიზიტების სტატუსი და მათი გამოყენების წესი, საერთაშორისო ოლიმპიური კომიტეტის მიერ განსაზღვრულია ოლიმპიური ქარტიით, რომელიც ოლიმპიური რეკვიზიტების გამოყენებისათვის ითვალისწინებს ნებართვას.
„ადგილობრივი ეროვნული ოლიმპიური კომიტეტები, ისევე როგორც საქართველოს ეროვნული ოლიმპიური კომიტეტი, პასუხისმგებელნი არიან ადგილობრივ დონეზე უზრუნველყონ ოლიმპიური ქარტიის დებულებებისა და საერთაშორისო ოლიმპიური კომიტეტის ინტერესების დაცვა“, - ნათქვამია დამაზუსტებელ განცხადებაში.
შეგახსენებთ, ოლიმპიური თამაშები საფრანგეთში 26 ივლისიდან 11 აგვისტომდე ტარდება.