„არავის უხარია ვინმეს დასჯა, სადისტი ბაჩო ახალაიასიც კი, რეალურად სახელმწიფო ინტერესია, რომელიც უპირველესყოვლისა უნდა გავითვალისწინოთ“, – ამის შესახებ პარლამენტის ვიცე-სპიკერმა გიორგი ვოლსკიმ განაცხადა.

მისივე თქმით, გამოძიების მასალები უტყუარი უნდა იყოს და დაცვის ხაზი გადაწონოს.

„მთელი სისტემა არის აწყობილი. იქ, იმ ადამიანებთან, ვინც დაკავშირებულია ამ რევოლუციურ ჯგუფთან აღმოაჩინეს უკრაინიდან გამოგზავნილი ასაფეთქებელი. ბაჩო ახალაიასაც, ზუსტად 4 ოქტომბერს ყოველ წუთში ურეკავდნენ, ამ ექსტრემისტების გადაადგილების პოზიციები იცვლებოდა. საერთოდ ამდენი ფულია დახარჯული ლობისტებში, – ეს ყველაფერი ერთ კონტექსტში უნდა განვიხილოთ. სამწუხაროა, არავის უხარია ვინმეს დასჯა, სადისტი ბაჩო ახალაიასიც კი. რეალურად არის სახელმწიფო ინტერესი, რომელიც უპირველესყოვლისა უნდა გავითვალისწინოთ. ქვეყნის არევა, მარიონეტული ხელისუფლების მოყვანა, კონკრეტულ ადამიანებს, კონკრეტულ ძალებს კონკრეტული მიზნით სჭირდებათ. თუნდაც დუმილის უფლებას ინარჩუნებს, მიანიშნებს, რომ რაღაც უბედურება ხდებოდა და ამ უბედურებაში თვითონ იყო ჩართული. რასაკვირველია, გამოძიება თავის მასალებს დადებს, უნდა იყოს უტყუარი, მტკიცებულებათა ერთობლიობამ დაცვის ხაზი უნდა გადაწონოს, მაგრამ ამას მოსამართლე გადაწყვეტს“, – განაცხადა ვოლსკიმ.

ცნობისთვის, სასამართლომ თავდაცვის ყოფილ მინისტრ ბაჩო ახალაიას აღკვეთის ღონისძიების სახით პატიმრობა შეუფარდა.

სახელმწიფო უსაფრთხოების სამსახურმა ახალაია 4 ოქტომბრის მოვლენებთან დაკავშირებით დააკავა. ახალაიას ბრალდება საქართველოს სისხლის სამართლის კოდექსის 225-ე მუხლის პირველი ნაწილით ჯგუფური ძალადობის ორგანიზება და ხელმძღვანელობა წარედგინა, რაც სასჯელის სახედ და ზომად ცხრა წლამდე თავისუფლების აღკვეთას ითვალისწინებს.