ჩვენთვის სასიამოვნოა, რომ შეერთებული შტატების სახელმწიფო დეპარტამენტი ღიად, დაუფარავად საუბრობს იმაზე, რომ ძალიან მნიშვნელოვანია გარე ჩარევებისგან სახელმწიფოს დაცვა და ამის პრევენცია, - განაცხადა „დღის ქრონიკაში“ იურიდიულ საკითხთა საპარლამენტო კომიტეტის თავმჯდომარის პირველმა მოადგილემ თორნიკე ჭეიშვილმა.

თორნიკე ჭეიშვილმა აღნიშნა, რომ ეს ფაქტი ქართული-ამერიკული ურთიერთობების გადატვირთვის კონტექსტში უნდა იყოს განხილული.

დეპუტატმა ხაზი გაუსვა ბოლო პერიოდში დაფიქსირებულ პოზიტიურ იმპულსებს, მათ შორის საქართველოსა და აშშ-ის ხელისუფლების წარმომადგენლების შეხვედრებს.

„ეს გვაძლევს იმედს იმისა, რომ ძალიან მალე გვექნება გაცილებით უფრო კონკრეტული და ხელშესახები შედეგები იმ გზაზე, რასაც ურთიერთობების გადატვირთვა და სტრატეგიული თანამშრომლობის სრული მასშტაბით განახლება ჰქვია“, - აღნიშნა ჭეიშვილმა.

მისი თქმით, საქართველო განაგრძობს თავისი სუვერენიტეტის დაცვას ყოველგვარი კომპრომისების გარეშე და ამ საკითხში „გრანტების შესახებ“ კანონში შესატანი ცვლილებების მნიშვნელობას გაუსვა ხაზი.