პარლამენტის თავდაცვისა და უსაფრთხოების კომიტეტის თავმჯდომარის პირველი მოადგილის თენგიზ შარმანაშვილის განცხადებით, საქართველოში ნარკოტიკების წინააღმდეგ ბრძოლა დღეს უპრეცედენტო მასშტაბით მიმდინარეობს.

მისი თქმით, ამ მიმართულებით არსებული შედეგების შესაფასებლად წინა ხელისუფლების პერიოდში ამოღებული ნარკოტიკების, გამოვლენილი გამსაღებლების, მკვლელობებისა და ძალადობის შემთხვევების სტატისტიკა დღევანდელ მონაცემებს უნდა შეედაროს.

„ახლა, რომ მიმდინარეობს ნარკოტიკების წინააღმდეგ ბრძოლა საქართველოს ისტორიის მანძილზე ასეთი არასდროს ყოფილა.

თქვენი ყოფილი თავმჯდომარე იყო შინაგან საქმეთა მინისტრი. პირადად მინდა ვთხოვო შინაგან საქმეთა სამინისტროს, იმ პერიოდის ამოღებული ნარკოტიკების რაოდენობა გამოაქვეყნოს და მერე შევუდაროთ ახლა ამოღებული ნარკოტიკების რაოდენობას. იმ დროინდელი გამსაღებლების რაოდენობა რამდენი გამოავლინეს ვნახოთ და ახლა ამოვიღოთ და ვნახოთ რამდენი გამსაღებელი გამოავლინეს.

მკვლელობები, იმ დროს რამდენი იყო და ახლა რამდენია. გახსნა იმ დროს მკვლელობებისა და ძალადობებისა რამდენი იყო და ახლა რამდენია. თუ არა გაქვთ თემები, მე თვითონ მოგაწვდით რა არ მომწონს ჩვენს საქმიანობაში, მაგრამ ტყუილებს ნუ გვაბრალებთ, ეს ტყუილის დაბრალება რა უბედურებაა, ან რა დივიდენდს მოგიტანთ“, - აცხადებს პარლამენტის თავდაცვისა და უსაფრთხოების კომიტეტის თავმჯდომარის პირველი მოადგილე.