პარლამენტის თავმჯდომარემ შალვა პაპუაშვილმა „რუსთავი 2-ის“ გადაცემა „დებატებში“ არასამთავრობო სექტორის საქმიანობასა და უცხოურ დაფინანსებაზე ისაუბრა. მისი თქმით, საქართველოსთან დაკავშირებით უცხოელების მთავარი პრობლემა ის არის, რომ ქვეყანამ უცხოური დაფინანსების გამჭვირვალობა და ფინანსების კონტროლი მოითხოვა, რისი შანსიც სექტორმა არ გამოიყენა.

შალვა პაპუაშვილმა „ნამოხვანჰესის“ პროექტის მაგალითი მოიყვანა და აღნიშნა, რომ არასამთავრობო ორგანიზაციებმა ქვეყნის ენერგეტიკული უსაფრთხოება დიდი ხნით გადაწიეს და პროექტის ჩაშლით საქართველოს შესაძლო ჯარიმები დააკისრეს, რაც პირდაპირ NGO-ების სინდისზეა და ქვეყნის ეკონომიკური ინტერესების წინააღმდეგ არის მიმართული.

„მთავარი პრობლემა, რაც უცხოელებს საქართველოსთან აქვთ, არის ის, რომ ჩვენ გავბედეთ და მოვითხოვეთ უცხოური დაფინანსების გამჭვირვალობა, მოვითხოვეთ, ჩაგვეხედა იმაში, თუ რა ფინანსდება. ასე რომ, შანსი ჰქონდა არასამთავრობო სექტორს, ეს შანსი არ გამოიყენა, არც არასამთავრობო სექტორმა და არც NGO-ებმა. ასე რომ, ეს რაღაც იგავები საგადასახადო სისტემასთან დაკავშირებით არ გვინდა.

„ნამოხვანჰესის“ მაგალითი არის მართლაც სახელმძღვანელო მაგალითი იმისა, თუ როგორ დააზიანეს NGO-ებმა ქვეყანა. დააზიანეს არა მხოლოდ იმით, რომ ენერგეტიკული უსაფრთხოება გადაწიეს დიდი ხნით, ის სიმძლავრეები, რაც შეიძლება გამოემუშავებინა და გარდა ამისა, ის ჯარიმა, სავარაუდოდ, საბოლოო ჯამში, რაც შეიძლება საქართველოს დაეკისროს, ეს არის პირდაპირ NGO-ების სინდისზე, რომლებმაც მაშინ ეს პროექტი ჩაშალეს. კიდევ ერთხელ ეს არის ზუსტად იმის მაგალითი, თუ როგორ გამოიყენება NGO-ები საქართველოს ეკონომიკური ინტერესების წინააღმდეგ და ქართველი ხალხის წინააღმდეგ, საბოლოო ჯამში“, - განაცხადა შალვა პაპუაშვილმა.