„იმის გათვალისწინებით, რომ ყველა სპეკულაციას დაესვას წერტილი, არ იყოს არანაირი ნიადაგი იმისთვის, რომ ხელოვნურადაც კი მოხდეს რაღაც საკითხებზე ტემპერატურის აწევა და ტყუილების დემონსტრირება, იქნა მიღებული გადაწყვეტილება ეუთო/ოდირის სადამკვირვებლო მისიის მოწვევის შესახებ“, - ასე ეხმაურება მმართველი გუნდის წევრი დავით მათიკაშვილი არჩევნებზე ეუთო/ოდირის სადამკვირვებლო მისიის მოწვევას.

მისი თქმით, შექმნილი იქნება ყველა პირობა, რომ ეუთო/ოდირმა, როგორც წინასაარჩევნო პერიოდში, ისე არჩევნების დღეს იმუშაოს სრული დატვირთვით.

„გამოვთქვათ იმედს, რომ მეტი პატივისცემით და მეტი არსებითი ხედვით იქნება განმსჭვალული ყველა ის შეხედულება, რომელიც ეუთო/ოდირის საქმიანობასთან იქნება საქართველოში დაკავშირებული.

ბურთი არის მათ მხარეს, ჩვენ ველოდებით მათ ჩამობრძანებას და შექმნილი იქნება აბსოლუტურად ყველა პირობა იმისთვის, რომ ეუთო/ოდირმა, როგორც სადამკვირვებლო მისიამ, როგორც წინასაარჩევნო პერიოდში, ისე არჩევნების დღეს იმუშაოს სრული დატვირთვით და დადოს სამართლიანი, სწორი და ობიექტური დასკვნა“, - აღნიშნავს მათიკაშვილი.

შეგახსენებთ, საქართველოს ხელისუფლებამ 4 ოქტომბრის არჩევნებზე ეუთო/ოდირს მოწვევის წერილით მიმართა.