„ამ კანონისთვის მხარი რომ დაეჭირათ, ძალიან სერიოზულად დაიტუქსებოდნენ თავიანთი პატრონებისგან და დარბაზში რომ მსხდარიყვნენ და მხარი არ დაეჭირათ, დაკარგავდნენ ამომრჩევლის ძალიან დიდ ნაწილს, ვინაიდან მთელი ერი და ბერი შეთანხმებული, რომ ეს არის სერიოზული გამოწვევა, მნიშვნელობა არ აქვს ვისი მხარდამჭერია“, - განაცხადა გადაცემაში „იმედის კვირა“ ფრაქცია „ქართული ოცნების“ თავმჯდომარის პირველმა მოადგილემ ლევან მაჭავარიანმა ოჯახური ღირებულებებისა და არასრულწლოვანის დაცვის შესახებ კანონზე საუბრისას.

მისივე თქმით, გახარიას პარტია მესამე მოსმენაზე არ შესულა პარლამენტში, რადგან მათაც დატუქსავდა არაფორმალური ოლიგარქიული მმართველობის წარმომადგენელი.

„არც ერთ ქვეყანაში, ერთ დღეში არ დაუკანონებიათ ერთნაირსქესიანთა ქორწინება, არც ბავშვებისთვის პროპაგანდა და აგიტაცია სკოლებსა და ბაღებში. ეს ყველაფერი განგრძობითი პროცესია. იწყება პრაიდის მარშებით, გადადის სხვა ფორმაში, შემდეგ, აძლევენ წყვილს დაქორწინების უფლებას, ბავშვის აყვანის უფლებას და ა.შ. ჩვენ გვინდა, რომ ეს პრობლემა ძირშივე მოიკვეთოს და ამიტომ გადავდგით ეს ნაბიჯი“, - აღნიშნა ლევან მაჭავარიანმა.