პარლამენტში ქართული ხორბლისა და პურის პროდუქტების განვითარების საკითხებზე სამუშაო შეხვედრა გაიმართა
საქართველოს პარლამენტის სოფლის მეურნეობის კომიტეტის ინიციატივით, ქართული ხორბლისა და პურის პროდუქტების განვითარების საკითხებზე გაცნობითი სამუშაო შეხვედრა გაიმართა.
შეხვედრას სოფლის მეურნეობის კომიტეტის თავმჯდომარე გელა სამხარაული უძღვებოდა.
შეხვედრის მონაწილეები ქართული ხორბლისა და პურის წარმოების მიმართულებით მომუშავე მეწარმეებისა და ფერმერების საქმიანობასა და საჭიროებებს გაეცნენ, დარგობრივი და სამეცნიერო ორგანიზაციების ხედვა მოისმინეს. შეხვედრაზე ქართული ხორბლისა და პურის პროდუქტების განვითარების შესაძლებლობებზე იმსჯელეს.
როგორც შეხვედრისას აღინიშნა, სამუშაო ჯგუფის მიზანი იუნესკოს (UNESCO) მიერ „ქართული ხორბლის კულტურა: ტრადიციები და რიტუალების“ კაცობრიობის არამატერიალური კულტურული მემკვიდრეობის წარმომადგენლობით სიაში შეტანის შედეგად წარმოქმნილი შესაძლებლობების გამოყენებაა. ამასთანავე, სამუშაო ჯგუფი მიზნად ისახავს ქართული ხორბლის ისტორიული, კულტურული და გენეტიკური მემკვიდრეობის ეკონომიკურ ღირებულებად გარდაქმნის ხელშეწყობას ისე, რომ კომერციული განვითარების პროცესში მისი ავთენტურობა, ხარისხი და თვითმყოფადობა შენარჩუნდეს.
„ვისაუბრეთ ხორბლის უძველესი ქართული ჯიშების გამრავლების, მათი წარმოებაში უფრო ინტენსიურად დანერგვისა და პოპულარიზაციის საკითხებზე. ეს ჩვენი წინაპრების მიერ დატოვებული სიმდიდრეა, რომელსაც მსოფლიო აღიარებს. ქართული ხორბლის მემკვიდრეობის შენარჩუნება და მისი ეკონომიკურ შესაძლებლობად გარდაქმნა საერთო საქმეა. ამ პროცესის საფუძველი დარგში მომუშავე ადამიანების გამოცდილება, საჭიროებები და ერთობლივი მოქმედება უნდა იყოს“, - განაცხადა გელა სამხარაულმა.
შეხვედრის მონაწილეები ქართული ხორბლისა და პურის პროდუქტების განვითარების საკითხებზე მუდმივმოქმედი სამუშაო ჯგუფის შექმნასა და სამომავლო თანამშრომლობაზე შეთანხმდნენ.
შეხვედრას ასევე ესწრებოდა სოფლის მეურნეობის კომიტეტის თავმჯდომარის მოადგილე დავით შერაზადიშვილი.
