უკრაინის პრეზიდენტმა ვოლოდიმირ ზელენსკიმ განაცხადა, რომ უკრაინა პარტნიორებთან სანქციებს სინქრონიზაციას გაუწევს და რუსეთის ენერგეტიკულ სექტორზე ზეწოლას გააძლიერებს. ამის შესახებ ზელენსკიმ Facebook-ზე სანქციების პოლიტიკის შესახებ გამართული შეხვედრის შემდეგ განაცხადა.

მისი თქმით, მთავარი პრიორიტეტებია სანქციების სრული სინქრონიზაცია საერთაშორისო პარტნიორებთან, რუსეთის ენერგეტიკულ სექტორზე შემდგომი ზეწოლა და ფინანსური არხების ბლოკირება, რომლებიც კრემლს ომის გახანგრძლივებაში ეხმარება.

„ჩვენ შევთანხმდით კონკრეტულ გადაწყვეტილებებზე. პირველ რიგში, ჩვენი სახელმწიფოსა და პარტნიორების სანქციების სრულად სინქრონიზაცია. ევროკავშირისა და სხვა გლობალური სუბიექტების სანქციების პაკეტები ასევე სრულად უნდა დადასტურდეს უკრაინის ეროვნული სანქციების შესახებ გადაწყვეტილებებით“, - ხაზი გაუსვა სახელმწიფოს მეთაურმა.

ზელენსკიმ ასევე დაისახა სანქციების გაფართოების ამოცანა რუსული „ჩრდილოვანი ფლოტის“ კაპიტნებისთვის, ასევე, ნავთობის გადაზიდვის რუსული ტერმინალებისთვის. შესაბამისი გადაწყვეტილებები ასევე უნდა იყოს სინქრონიზებული პარტნიორებთან.

„ჩვენ ვაფიქსირებთ ფაქტებს, რომ ერთი და იგივე ნავთობტანკერებს იყენებენ როგორც რუსეთი, ასევე ირანი ომის დასაფინანსებლად. ჩვენ ცალკე ვმუშაობთ სანქციების დაწესებაზე იმ გაზის გადამზიდავების წინააღმდეგ, რომელთა გამოყენებასაც რუსეთი თავის პროექტებში გეგმავს“, - აღნიშნა უკრაინის პრეზიდენტმა. 

შეხვედრაზე ასევე განიხილეს სანქციების ახალი სფეროები, რათა რუსეთს ომის გახანგრძლივება გაურთულდეს. კერძოდ, ეს ეხება ფინანსურ ინსტრუმენტებს, კრიპტოვალუტებს, გადახდის სქემებს და რუსეთისთვის იარაღის წარმოებისთვის კომპონენტებისა და აღჭურვილობის მიწოდებას.