უკრაინის პრეზიდენტმა ვოლოდიმირ ზელენსკიმ განაცხადა, რომ რუსეთი დაინტერესებულია პოლონეთსა და უკრაინას შორის კონფლიქტით, მაგრამ დამოუკიდებელი უკრაინის გარეშე მოსკოვი პოლონეთისკენ დაიძვრება. ამის შესახებ მან ვარშავაში, პოლონეთის პრეზიდენტ კაროლ ნავროცკისთან ერთად გამართულ პრესკონფერენციაზე განაცხადა.

ზელენსკიმ ახსენა პოლონეთისა და უკრაინის საზოგადოებებში არსებული რთული მომენტები, თუმცა, მისი თქმით, პრეზიდენტებმა უნდა განსაზღვრონ პოლიტიკა, რომელიც ორ ერს გააერთიანებს. 

„ჩვენი სახელმწიფოს დამოუკიდებლობის გარეშე, მოსკოვი აუცილებლად მოვა აქ, უფრო ღრმად ევროპაში. ჩვენი დამოუკიდებლობის გარეშე, მოსკოვი აუცილებლად მოვა პოლონეთისთვის. და სწორედ ამიტომ არის მნიშვნელოვანი, რომ ჩვენ აქ ვართ. მნიშვნელოვანია, რომ თქვენ აქ ხართ. მნიშვნელოვანია, რომ უკრაინა და პოლონეთი აქ არიან და მნიშვნელოვანია, რომ ჩვენ ერთად ვიდგეთ“, - აღნიშნა ზელენსკიმ.

ამასთან, მან ნავროცკი უკრაინაში მიიწვია. 

„უკრაინა იცავს საკუთარ თავს და ევროპას. ჩვენ ყველაზე დიდი ფასი გადავიხადეთ - ჩვენი ხალხის სიცოცხლე“, - განაცხადა უკრაინის პრეზიდენტმა და ხაზგასმით აღნიშნა, რომ უკრაინა მადლიერია პოლონეთის მხარდაჭერისთვის.

ამავდროულად, მან პოლიტიკოსებს მოუწოდა, თავშეკავება გამოიჩინონ ისეთი განცხადებების დროს, რომლებიც ორი ხალხის ერთიანობას საფრთხეს უქმნის.

„ყველა ფრთხილად და წინდახედულად უნდა მოვიქცეთ. რუსეთს სურს უთანხმოების შექმნა და ორ ხალხს შორის ძლიერი ალიანსის დანგრევა. ჩვენ მათ ამის უფლებას არ მივცემთ“, - განაცხადა ზელენსკიმ.