რუსეთის პრეზიდენტმა ვლადიმერ პუტინმა განაცხადა, რომ უკრაინასთან ოთხნახევარწლიანი ომის დარეგულირების ყველა წინადადება კვლავ განხილვის პროცესშია, თუმცა მოსკოვმა ჯერ კიდევ უნდა შეაფასოს, რა შედის მის საუკეთესო ინტერესებში.

პუტინმა ასევე განაცხადა, რომ მოსკოვი მზად იყო კიევთან მოლაპარაკებების გასაახლებლად რუსეთში გასულ კვირას გამართული საპარლამენტო არჩევნების შემდეგ, თუმცა უკრაინამ მოსკოვზე თავდასხმები განახორციელა და საარჩევნო უბნებს დაარტყა.

რუსეთის სიდიდით მეორე ქალაქ სანქტ-პეტერბურგში ჟურნალისტებთან საუბრისას პუტინმა განაცხადა, რომ სწორედ უკრაინამ წამოიწყო პროვოკაციული თავდასხმები და ახლა მას მოუწევს ფასის გადახდა.

„სწორედ მათ დაიწყეს ეს, ყველგან, ყველა ფრონტზე. განა ეს სათამაშოებია, ბავშვური თამაშია? ამიტომ მათ უნდა იგრძნონ რუსეთის საპასუხო დარტყმები და გააცნობიერონ, რომ არანაირი პროვოკაციული ქმედება და არანაირი მცდელობა, სიტუაციის გამწვავების გზით მიაღწიონ სასურველ შედეგს არ გაამართლებს. ისინი მხოლოდ საკუთარ მდგომარეობას აუარესებენ“, — განაცხადა პუტინმა რუსული ტელევიზიით გადაცემულ გამოსვლაში.

უკრაინის პრეზიდენტმა ვოლოდიმირ ზელენსკიმ განაცხადა, რომ რუსეთზე განხორციელებული დარტყმები სამართლიანი პასუხი იყო მის ქვეყანაში მშვიდობიან მოსახლეობასა და ინფრასტრუქტურაზე მიტანილ იერიშებზე. ამასთან, მან ომის მოსაგვარებლად რუსეთს პირდაპირი მოლაპარაკებებისკენ მოუწოდა. 

კრემლის ლიდერის თქმით, სწორედ რუსეთის საპასუხო ქმედებები გახდა მიზეზი იმისა, რომ უკრაინამ ცეცხლის შეწყვეტა და მოლაპარაკებების განახლება ითხოვა. 

„ყველა ვარიანტი განხილვის საგანია. ყველაფერი შესაძლებელია. თუმცა იმის შემდეგ, რაც მათ ჩაიდინეს, მაინც კარგად უნდა დავფიქრდეთ, რა ნაბიჯები უნდა გადავდგათ საპასუხოდ“, - აღნიშნა მან.