ვიქტორ ორბანი აცხადებს, რომ რუსეთ-უკრაინის ომი მხოლოდ იმ შემთხვევაში დასრულდება, თუ უკრაინა ბუფერული სახელმწიფოს სტატუსს დაუბრუნდება. ამასთან, ტელეარხ M1-ის ეთერში უნგრეთის პრემიერ-მინისტრმა ევროპელი ლიდერები კონფლიქტის ფინანსური სარგებლის მიზნით გახანგრძლივებაში დაადანაშაულა.

ორბანის თქმით, ევროპა აგრესიულ პოზიციას იკავებს და უკრაინის სამხედრო გამარჯვების შესაძლებლობის სჯერა. მისი თქმით, ომი დასავლეთის ქვეყნებისთვის სასარგებლოა და ბრიუსელის ელიტა რუსეთის დამარცხებით მოგებას ელოდება.

„ევროპელებს ომი სურთ. ჩვენ გვინდა მშვიდობა, ცეცხლის შეწყვეტა და უსაფრთხოება. ომის სურვილის უკან ფული დგას. უკრაინას მათ ჯერ ფული მისცეს, შემდეგ იარაღი, ახლა კი საფრანგეთი და სხვა ქვეყნები ჯარისკაცების პოტენციურ განლაგებასთან დაკავშირებით საუბრობენ“, – თქვა ორბანმა.

მან, ასევე, დაადანაშაულა ევროპელი და ამერიკელი ლიდერები, რომ სავარაუდოდ მზად არიან, ამისთვის უკრაინული სისხლით გადაიხადონ. უნგრეთის პრემიერის თქმით, ნატოს გაფართოება და უკრაინის ევროკავშირსა და ალიანსში ინტეგრაციისკენ სწრაფვა, ისტორიულ შეთანხმებებს არღვევს და საფრთხეს უქმნის მოსკოვს.

ორბანის თქმით, მშვიდობის მისაღწევად ერთადერთი რეალისტური გზა უკრაინის ბუფერული სახელმწიფოს სტატუსში დაბრუნებაა.

„ნატო და რუსეთი შეთანხმდებოდნენ ბუფერულ ზონაში მოქმედი შეზღუდული უკრაინული შეიარაღებული ძალების რაოდენობასა და აღჭურვილობაზე და ორივე მხარე გარანტიას იძლეოდა, რომ არავინ მოაქცევდა ამ ბუფერულ სახელმწიფოს საკუთარი გავლენის ქვეშ. საერთაშორისო სამართალი იცნობს იმ საშუალებებს, რომლითაც შეიძლება ასეთი გარანტიის სისტემის შექმნა“, – განაცხადა მან.