ბაშკირეთის დედაქალაქ უფაში უპილოტო საფრენმა აპარატებმა სამრეწველო ზონას შეუტიეს, სადაც რამდენიმე ნავთობგადასამუშავებელი საწარმო მდებარეობს. საჰაერო იერიშის შედეგად სულ მცირე ორი ნავთობგადასამუშავებელი ქარხანა დაზიანდა. ინფორმაციას Deutche Welle ავრცელებს.

Telegram-არხ Astrasvg-ის ინფორმაციით, რომელმაც თვითმხილველების მიერ გადაღებული ფოტოები გააანალიზა, ერთ-ერთი სამიზნე ქარხანა „ბაშნეფტ-ნოვოილი“ იყო. პუბლიკაციაში აღნიშნულია, რომ ეს საწარმო უფის ნავთობგადასამუშავებელი კომპლექსის საკვანძო ელემენტია, რომელიც მაღალი ხარისხის, ევრო-6 სტანდარტის ბენზინს, დიზელის საწვავს, საავიაციო ნავთსა და სამრეწველო ზეთებს აწარმოებს“.

უფის სამრეწველო ზონაში ერთმანეთის სიახლოვეს კომპანია „ბაშნეფტის“ სამი მსხვილი ნავთობგადასამუშავებელი ქარხანა მდებარეობს. „ბაშნეფტ-ნოვოილის“ (ნოვოუფის ნავთობგადასამუშავებელი ქარხანა) გარდა, ესენია „ბაშნეფტ-უფანეფტეხიმი“ და „ბაშნეფტ-უნპზ“ (უფის ნავთობგადასამუშავებელი ქარხანა).

მოგვიანებით, Telegram-არხმა Exilenova+-მა ე გაავრცელა ინფორმაცია უკრაინის მიერ როსტოვის ოლქის ქალაქ კამენსკ-შახტინსკში მდებარე ფედერალურ სახელმწიფო საწარმო „კომბინატ კამენსკიზე“ სარაკეტო და დრონებით განხორციელებული იერიშის შესახებ.

როგორც არხი აღნიშნავს, ფედერალური სახელმწიფო საწარმო „კომბინატ კამენსკი“ როსტოვის ოლქში რუსეთის სამხედრო-სამრეწველო კომპლექსის ერთ-ერთი საკვანძო საწარმოა: ეს საწარმო ზალპური ცეცხლის რეაქტიული სისტემებისა და საჰაერო თავდაცვის კომპლექსებისთვის განკუთვნილი მყარი სარაკეტო საწვავისა და ასაფეთქებელი ნივთიერებების ძირითადი მწარმოებელია.