უნგრეთი სისხლის სამართლის საერთაშორისო სასამართლოს შესახებ შეთანხმებიდან გასვლის პროცესს იწყებს. ამის შესახებ უნგრეთის პრემიერ-მინისტრის ადმინისტრაციის ხელმძღვანელმა გერგელ გუიაშმა განაცხადა. ინფორმაციას Deutche Welle ავრცელებს.

„უნგრეთი სისხლის სამართლის საერთაშორისო სამართლის შეთანხმებას ტოვებს. ჩვენ ამ პროცესს საკონსტიტუციო ნორმებისა და საერთაშორისო სამართლის შესაბამისად განვახორციელებთ“, - დაწერა მან Facebook-ში.

ეს გადაწყვეტილება ბუდაპეშტმა უნგრეთში ისრაელის პრემიერ-მინისტრის, ბენიამინ ნეთანიაჰუს ვიზიტის პარალელურად მიიღო, რომლის დაკავებაზე სისხლის სამართლის სასამართლომ ორდერი გასცა.

ნეთანიაჰუს და ისრაელის თავდაცვის მაშინდელი მინისტრის, იოავ გალანტის დაკავების ორდერი სისხლის სამართლის საერთაშორისო სასამართლომ 2024 წლის 21 ნოემბერს გასცა. ეს გადაწყვეტილება სასამართლომ ღაზას სექტორში ისრაელის ხელისუფლების ქმედების გამო მიიღო. უნგრეთის პრემიერ-მინისტრმა ვიქტორ ორბანმა მაშინ სასამართლოს ეს გადაწყვეტილება დაგმო.