უკრაინას სურს, „სამშვიდობო გეგმის“ განსახილველად ნოემბერში პრეზიდენტ ვოლოდიმირ ზელენსკის შეერთებულ შტატებში ვიზიტი მოაწყოს. ამის შესახებ უკრაინის ეროვნული უსაფრთხოებისა და თავდაცვის საბჭოს მდივანმა რუსტემ უმეროვმა Facebook-ზე განაცხადა.

„ჩვენ ვაფასებთ ჟენევაში უკრაინისა და აშშ-ის დელეგაციებს შორის გამართულ პროდუქტიულ და კონსტრუქციულ შეხვედრებს, ასევე პრეზიდენტ ტრამპის ურყევ ძალისხმევას ომის დასასრულებლად“, - აღნიშნა უმეროვმა.

მისი თქმით, უკრაინისა და აშშ-ის დელეგაციებმა ჟენევაში განხილული შეთანხმების ძირითად პირობებთან დაკავშირებით ურთიერთგაგებას მიაღწიეს.

ამავდროულად, როგორც უმეროვმა აღნიშნა, უკრაინა შემდგომ ნაბიჯებში ევროპელი პარტნიორების მხარდაჭერას იმედოვნებს.

„ჩვენ მოუთმენლად ველით უკრაინის პრეზიდენტის აშშ-ში ვიზიტის ორგანიზებას ნოემბერში, რაც შეიძლება მალე, საბოლოო ნაბიჯების დასასრულებლად და პრეზიდენტ ტრამპთან შეთანხმების მისაღწევად“, - აღნიშნა უმეროვმა.