CBS News-ის ცნობით, თეთრი სახლი არ იყო ინფორმირებული უკრაინის მიერ რუსეთის სტრატეგიული ავიაციის წინააღმდეგ მასშტაბური დარტყმის განხორციელების გეგმების შესახებ.

გამოცემა დღევანდელი მოვლენების ზოგად შეჯამებას იძლევა და დასძენს, რომ თეთრი სახლის წარმომადგენლებმა უარი თქვეს უკრაინულ იერიშზე კომენტარის გაკეთებაზე.

„ადმინისტრაციის წყაროებმა კვირას [1-ელ ივნისს] CBS News-ს განუცხადეს, რომ თეთრმა სახლმა არ იცოდა, რომ ეს მოხდებოდა“, - აღნიშნავს გამოცემა.

იგივე ინფორმაცია სააგენტო Axios-მა უკრაინელ ოფიციალურ პირზე დაყრდნობით დაადასტურა.

„უკრაინამ ტრამპის ადმინისტრაციას შეტევის შესახებ წინასწარ არ აცნობა“, - თქვა წყარომ.

ცნობისთვის, უკრაინის უსაფრთხოების სამსახურმა 1-ელ ივნისს რუსეთის ოთხ სამხედრო აეროდრომზე საჰაერო იერიშები განახორციელა. უკრაინული მედიის ცნობით, „ბელაიას“, „დიაგილევოს“, „ოლენიასა“ და „ივანოვოს“ აეროდრომებზე 40-ზე მეტი თვითმფრინავი განადგურდა, მათ შორის სტრატეგიული ბომბდამშენები. წინასწარი მონაცემებით, მტრის თვითმფრინავებს 2 მილიარდ დოლარზე მეტის ზიანი მიადგა.

სპეცოპერაცია „აბლაბუდა“ წელიწად-ნახევარზე მეტი ხნის განმავლობაში მზადდებოდა. როგორც სპეციალური სამსახურის წყაროები იუწყებიან, ოპერაციის მიმდინარეობას პირადად პრეზიდენტი ვოლოდიმირ ზელენსკი აკონტროლებდა, ხოლო გეგმას უსაფრთხოების სამსახურის ხელმძღვანელი ვასილ მალიუკი და სამსახურის თანამშრომლები ახორციელებდნენ. მის ფარგლებში, სპეცსამსახურმა რუსეთში ჯერ FPV დრონები გაგზავნა, შემდეგ კი მობილური ხის სახლები, რომლებშიც დრონები იმალებოდა.

„შესაფერის მომენტში სახლების სახურავები დისტანციურად გაიხსნა და დრონები გაფრინდნენ რუსული ბომბდამშენების დასაბომბად“, - განუცხადა უკრაინულ მედიას წყარომ.