აშშ-ის სპეციალური წარმომადგენელი სტივ უიტკოფი ვარაუდობს, რომ პრეზიდენტ დონალდ ტრამპის ადმინისტრაცია ამჯობინებს, ირანთან არსებული დაძაბულობა დიპლომატიური გზით მოაგვაროს და არა სამხედრო ჩარევით.

ფლორიდაში ისრაელ-აშშ-ის საბჭოს კონფერენციაზე ინტერვიუს დროს, როდესაც უიტკოფს ჰკითხეს, ფიქრობს თუ არა, რომ ირანის წინააღმდეგ აშშ-ის სამხედრო დარტყმა მოსალოდნელია, მან უპასუხა: „იმედი მაქვს, რომ დიპლომატიური გადაწყვეტა იქნება. მართლა ვიმედოვნებ“.

უიტკოფის თქმით, ირანთან დიპლომატიური შეთანხმება ოთხ საკითხს მოაგვარებს. ესენია: „(1) ბირთვული გამდიდრება, (2) რაკეტები - მათ უნდა შეამცირონ თავიანთი მარაგი; (3) მათ ხელში არსებული [ბირთვული] მასალა, რომელიც დაახლოებით 2000 კილოგრამია და გამდიდრებულია 3.67%-დან 60%-მდე; და (4) მარიონეტები“.

უიტკოფი ვარაუდობს, რომ ირანი შესაძლოა, მზად იყოს, ოთხივე საკითხზე კომპრომისზე წავიდეს, რადგან მისი ეკონომიკა მძიმე მდგომარეობაშია.

„თუ მათ ერთა ლიგაში დაბრუნება სურთ, ჩვენ შეგვიძლია, ეს ოთხი პრობლემა დიპლომატიური გზით მოვაგვაროთ, მაშინ ეს შესანიშნავი გადაწყვეტა იქნებოდა. ალტერნატივა ცუდია“, - აღნიშნა მან. 

კითხვას, აქვს თუ არა რაიმე გზავნილი ირანელი ხალხისთვის, რომელსაც რეჟიმის დაცემა სურს, უიტკოფმა შემდეგნაირად უპასუხა: „ისინი წარმოუდგენლად მამაცი ხალხია და ჩვენ თქვენს გვერდით ვდგავართ“.

ინფორმაციისთვის, ტრამპი არაერთხელ დაემუქრა ირანს დარტყმით, თუ რეჟიმი მომიტინგეების მკვლელობას გააგრძელებდა. ირანში ანტისამთავრობო აქციებმა რამდენიმე ათასი ადამიანის სიცოცხლე შეიწირა.

თუმცა 14 იანვარს ტრამპმა განაცხადა, რომ თეირანმა მას აცნობა, რომ მომიტინგეების მკვლელობები შეწყდა, რამაც შექმნა ვარაუდი, რომ ვაშინგტონი ირანს არ დაარტყამს. თუმცა გასული დღის განმავლობაში აშშ-მა რეგიონში დამატებითი სამხედრო აქტივები გადაიტანა.

„გუშინ ირანელებს დავუკავშირდით და ერთ-ერთი რამ, რაც გვაშფოთებდა, იყო მკვლელობები, რომელთა შესახებაც ჭორები ვრცელდებოდა - მასობრივი ჩამოხრჩობები, რომლებიც უკვე შეჩერებულია“, - აღნიშნა უიტკოფმა.