ირანთან ურთიერთგაგების მემორანდუმის ხელმოწერასთან დაკავშირებით 29 მაისს გამართულ შეხვედრაზე აშშ-ის პრეზიდენტმა დონალდ ტრამპმა შეთანხმებაში რამდენიმე ცვლილების შეტანა მოითხოვა, მათ შორის ისლამური რესპუბლიკის დარჩენილი ბირთვული მასალისა და ჰორმუზის სრუტის გავლით გადაზიდვის საკითხთან დაკავშირებით, იტყობინება Axios-ი აშშ-ის ადმინისტრაციის მაღალჩინოსანსა და ამ საკითხთან დაკავშირებით ინფორმირებულ კიდევ ერთ ამერიკელ წყაროზე დაყრდნობით.

სტატიაში ნათქვამია, რომ ტრამპს შეთანხმების მიღწევა სურს და მოელის, რომ ის მალე გაფორმდება.

გავრცელებული ინფორმაციით, ურთიერთგაგების მემორანდუმი ამჟამად მოიცავს ირანის დაპირებას, რომ არ შეეცდება ბირთვული იარაღის შექმნას. მასში ნათქვამია, რომ მხარეებს 60-დღიანი ვადა ექნებათ ირანის ბირთვული ვალდებულებების და მაღალგამდიდრებული ურანის მარაგის განადგურების შესახებ მოლაპარაკებებისთვის, რომელიც, სავარაუდოდ, მიწისქვეშ არის დამარხული მას შემდეგ, რაც აშშ-მა 2025 წლის ივნისში ისრაელ-ირანის 12-დღიანი ომის დროს ირანის სამი მთავარი ბირთვული ობიექტი დაბომბა. 

თეთრი სახლის წარმომადგენელმა Axios-ს განუცხადა, რომ ტრამპს სურს, მემორანდუმის ეს ნაწილი განახლდეს უფრო კონკრეტული დეტალებით, „თუ როგორ იღებს აშშ მასალას და რა ვადებში“.

მეორე წყაროს ცნობით, ტრამპი ასევე ითხოვს ცვლილებების შეტანას ჰორმუზის სრუტის ხელახლა გახსნის ფორმულირებასთან დაკავშირებით.

„შეთანხმება იქნება. ვნახოთ, რამდენად მალე მოხდება ეს. მზად ვართ, დაველოდოთ, რომ პრეზიდენტმა მიიღოს ის, რასაც ითხოვს. ამას შეიძლება ერთი კვირა დასჭირდეს, შეიძლება ნაკლებიც, შეიძლება მეტიც. კვირის ბოლოს ვიმედოვნებთ, რომ რაღაც გვექნება“, - ციტირებს Axios-ი ადმინისტრაციის მაღალჩინოსანს.