აშშ-ის პრეზიდენტმა დონალდ ტრამპმა კიდევ ერთხელ გაიმეორა, რომ ინდოეთი რუსული ნავთობის შესყიდვას შეწყვეტს და აღნიშნა, რომ თუ ამას არ გააკეთებს, ნიუ-დელი „მასიური“ ტარიფების გადახდას გააგრძელებს. ამის შესახებ მან ჟურნალისტებს Air Force One-ის ბორტზე განუცხადა, წერს Reuters-ი. 

ტრამპის თქმით, ინდოეთის პრემიერ-მინისტრმა ნარენდრა მოდიმ მას უთხრა, რომ ინდოეთი რუსული ნავთობის შესყიდვას შეწყვეტდა. აშშ-ის პრეზიდენტი კი მას აფრთხილებს, რომ თუ ნიუ-დელი ამას არ გააკეთებს, ის „მასიური“ ტარიფების გადახდას გააგრძელებს.

როდესაც ინდოეთის განცხადებასთან დაკავშირებით ჰკითხეს, რომ მოდისა და ტრამპს შორის რაიმე საუბრის შესახებ არაფერია ცნობილი, ტრამპმა უპასუხა: „მაგრამ თუ მათ ამის თქმა სურთ, მაშინ ისინი უბრალოდ გააგრძელებენ უზარმაზარი ტარიფების გადახდას და ამის გაკეთება არ სურთ“.

როგორც Reuters-ი წერს, რუსული ნავთობი ტრამპისთვის ინდოეთთან ხანგრძლივი სავაჭრო მოლაპარაკებების ერთ-ერთი მთავარი გამაღიზიანებელი ფაქტორი იყო - ინდურ საქონელზე მისი 50%-იანი ტარიფების ნახევარი ამ შესყიდვების საპასუხოდ არის დაწესებული. აშშ-ის მთავრობამ განაცხადა, რომ ნავთობიდან მიღებული შემოსავალი უკრაინაში რუსეთის ომს აფინანსებს.

ინდოეთი საზღვაო გზით გადაზიდული რუსული ნავთობის უმსხვილესი მყიდველი გახდა, რომელიც ფასდაკლებით იყიდება მას შემდეგ, რაც დასავლეთის ქვეყნებმა უარი თქვეს შესყიდვებზე და მოსკოვს სანქციები დაუწესეს 2022 წელს უკრაინაში შეჭრის გამო.