აშშ-ის პრეზიდენტმა დონალდ ტრამპმა განაცხადა, რომ აზიაში ვიზიტის დროს ჩრდილოეთ კორეის ლიდერ კიმ ჩენ ინთან შეხვედრისთვის „100%-ით ღია“ იქნება.

Air Force One-ის ბორტზე ჟურნალისტების კითხვის პასუხად აშშ-ის პრეზიდენტმა აღნიშნა, რომ თავის ჩრდილოეთ კორეელ კოლეგასთან „ძალიან კარგი“ ურთიერთობა აქვს და მოუწოდა მათ, „ამის შესახებ ინფორმაცია გაავრცელონ“.

2019 წელს ტრამპი გახდა პირველი მოქმედი აშშ-ის პრეზიდენტი, რომელმაც თავისი პირველი ვადის განმავლობაში ჩრდილოეთ კორეის საზღვარი გადაკვეთა. მას შემდეგ ლიდერები ერთმანეთს აღარ შეხვედრიან. თეთრმა სახლმა კი განაცხადა, რომ ტრამპის აზიაში ხუთდღიანი ვიზიტისთვის, რომლის ფარგლებშიც ის მალაიზიის, იაპონიისა და სამხრეთ კორეის ლიდერებს შეხვდება, არაფერია დაგეგმილი.

გასულ თვეს კიმმა განაცხადა, რომ ტრამპთან დაკავშირებით „კარგი პირადი მოგონებები“ აქვს და რომ „არ არსებობს მიზეზი“, არ განახლდეს მოლაპარაკებები აშშ-სთან, თუ ის „მიატოვებს ბოდვით აკვიატებას“ ჩრდილოეთ კორეის მიერ ბირთვული იარაღის დათმობის სურვილის შესახებ.

მიუხედავად იმისა, რომ ზოგიერთი ექსპერტი კიმსა და ტრამპს შორის შეხვედრის ალბათობას ნაკლებად პროგნოზირებს, სხვები ვარაუდობენ, რომ ისინი საბოლოოდ მოლაპარაკებებს მომდევნო თვეებში გამართავენ.

„ჩვენ უნდა დავინახოთ, რომ მათი შეხვედრის პერსპექტივები გაიზარდა“, - განუცხადა Associated Press-ს სეულში კორეის ეროვნული დიპლომატიური აკადემიის ასისტენტ-პროფესორმა ბან კილ ჯუმ.

მისივე თქმით, კიმი, სავარაუდოდ, გადაწყვეტს, განაახლოს თუ არა დიპლომატია აშშ-ის პრეზიდენტთან, როდესაც ის მმართველი პარტიის მნიშვნელოვან კონფერენციას გამართავს, რომელიც იანვარშია მოსალოდნელი.

სამხრეთ კორეის კიუნგ ჰის უნივერსიტეტის ყოფილმა დეკანმა ჩუნგ ჯინ-იანგმა განაცხადა: „თუ კიმ ჩენ ინთან შეხვედრა შედგება, ტრამპი ამით იტრაბახებს და იამაყებს, რომ მას შეუძლია კორეის ნახევარკუნძულის პრობლემების მოგვარებაც, ამიტომ მასაც აქვს რაღაც მოსაგებად. მაგრამ ექნება კი აშშ-ს კიმ ჩენ ინისთვის სანაცვლოდ რაიმე არსებითი მისაცემად?“.

სამხრეთ კორეის ეროვნული გაერთიანების ინსტიტუტის ყოფილი პრეზიდენტი კო იუ-ჰვანი დაეთანხმა ამ მოსაზრებას და თქვა, რომ შეხვედრის უზრუნველსაყოფად ტრამპს ამჯერად მოუწევს, „რაიმე მიმზიდველი წინადადება“ წარმოადგინოს.