აშშ-ის პრეზიდენტმა დონალდ ტრამპმა განაცხადა, რომ ის უკრაინას უსაფრთხოების გარანტიებით დაეხმარება. ვაშინგტონის ვალდებულება, მონაწილეობა მიიღოს პოტენციურ სამშვიდობო, ან უსაფრთხოების კონტინგენტში, კვლავ განხილვის საგანი რჩება. ამის შესახებ ტრამპმა თეთრ სახლში ჟურნალისტებთან შეხვედრისას განაცხადა. 

 ამერიკელმა ლიდერმა განმარტა, რომ აშშ-ის როლი მოიცავს საჰაერო მხარდაჭერას, დაზვერვას და ა.შ.

ამავდროულად, მან განაცხადა, რომ შეერთებული შტატები ახლოს არის შეთანხმების მიღწევასთან როგორც უკრაინასთან, ასევე რუსეთთან.

„ვფიქრობდი, რომ უკრაინასთან შეთანხმების მიღწევასთან ძალიან ახლოს ვიყავით. სინამდვილეში, პრეზიდენტ ზელენსკის გარდა, მისი ხალხი აღფრთოვანებული იყო შეთანხმების კონცეფციით“, - განაცხადა ამერიკელმა ლიდერმა.

ტრამპმა ასევე დაადასტურა, რომ შაბათს, 13 დეკემბერს, ევროპაში შეხვედრა იგეგმება: „ჩვენ დავესწრებით, თუ რეალური შანსი იქნება. არ გვინდა დროის დაკარგვა. გვინდა, რომ ეს საკითხი მოგვარდეს, რათა ბევრი სიცოცხლე გადარჩეს“.

ამასთან, ტრამპის თქმით, ნოემბერში რუსეთ-უკრაინის ომში დაახლოებით 25 000 ადამიანი დაიღუპა - ძირითადად ჯარისკაცები, თუმცა თავდასხმების შედეგად მშვიდობიან მოსახლეობაშიც იყო მსხვერპლი.

„მინდა, რომ მკვლელობები შეწყდეს... ძალიან მინდა, რომ ეს შეწყდეს და ჩვენ ამაზე ძალიან დაჟინებით ვმუშაობთ“, - დასძინა მან.

ამერიკელმა ლიდერმა ასევე აღნიშნა, რომ ასეთმა ომებმა შეიძლება გლობალურ დონეზე ესკალაცია გამოიწვიოს.

„ეს ყველაფერი დიდი მსოფლიო ომებით მთავრდება. თუ ყველა გააგრძელებს ამ თამაშების თამაშს, ისინი მესამე მსოფლიო ომში აღმოჩნდებიან. და ჩვენ არ გვინდა, რომ ეს მოხდეს“, - განაცხადა დონალდ ტრამპმა.