თეთრი სახლის პრესმდივანმა კეროლაინ ლევიტმა განაცხადა, რომ თუ თეირანი ომში დამარცხებას არ აღიარებს, აშშ ირანს „უფრო ძლიერად დაარტყამს, ვიდრე ოდესმე“. ამის შესახებ მან პრესკონფერენციაზე განაცხადა.

ლევიტის თქმით, აშშ-ის პრეზიდენტი დონალდ ტრამპი სამხედრო მოქმედებებზე მეტად უპირატესობას მშვიდობას ანიჭებს. თუმცა, მან დასძინა, რომ თუ თეირანი დამარცხებას არ აღიარებს, მას „ჯოჯოხეთი“ ელის.

„თუ ირანი არ შეეგუება დღევანდელ რეალობას - თუ არ გაიგებს, რომ სამხედრო თვალსაზრისით დამარცხდა და კვლავაც მარცხდება - პრეზიდენტი ტრამპი უზრუნველყოფს, რომ ირანმა უფრო ძლიერი დარტყმა მიიღოს, ვიდრე ოდესმე... პრეზიდენტი ტრამპი არ ცრუობს; ის მზადაა, ჯოჯოხეთი გააჩაღოს. ირანმა აღარ უნდა დაუშვას შეცდომა“, - განაცხადა თეთრი სახლის პრესმდივანმა.

მან ასევე აღნიშნა, რომ საწვავისა და ბენზინის ფასები ირანში აშშ-ის ოპერაციის დასრულებისთანავე დაეცემა.

ცნობისთვის, აშშ-მა ირანს პაკისტანის მეშვეობით ომის დასრულების 15-პუნქტიანი გეგმა გადასცა. პუნქტებს შორისაა თეირანის თავდაცვითი შესაძლებლობების შეზღუდვა, ირანის მიერ მარიონეტული ძალების მხარდაჭერის შეწყვეტა და ისრაელის არსებობის უფლების აღიარება.

ირანული მედიის ცნობით, ირანის ხელმძღვანელობამ ომის დასრულების შესახებ აშშ-ის 15-პუნქტიანი გეგმა უარყო და მას „გადაჭარბებული“ უწოდა.