უნგრეთის საგარეო საქმეთა მინისტრმა პიტერ სიიარტომ განაცხადა, რომ „დრუჟბას“ მილსადენით ნავთობის ტრანსპორტირების შეწყვეტა უკრაინის პრეზიდენტ ვოლოდიმირ ზელენსკის მხრიდან უნგრეთზე თავდასხმაა.

სიიარტომ ახლო აღმოსავლეთში ომის გამო საზღვაო ვაჭრობისთვის შექმნილ საფრთხეებზე გაამახვილა ყურადღება. 

„სწორედ ამიტომ არის ჩვენთვის მნიშვნელოვანი, გვქონდეს ძველი, კარგად ფუნქციონირებადი, საიმედო, იაფი, მაღალი სიმძლავრის ნავთობსადენი, რომელსაც შეუძლია, სრულად მოგვაწოდოს ნავთობი და ეს არის „დრუჟბას“ ნავთობსადენი“, - აღნიშნა მან.

უნგრელმა მინისტრმა კიდევ ერთხელ გაიმეორა, რომ „დრუჟბას“ მილსადენით უნგრეთში ნავთობი პოლიტიკური მიზეზების გამო არ მიედინება.

„და ეს პოლიტიკური მიზეზი ის არის, რომ უკრაინის პრეზიდენტი, პრეზიდენტი ზელენსკი, არ იძლევა „დრუჟბას“ მილსადენით ნავთობის ტრანსპორტირების აღდგენის უფლებას ბრიუსელი-ბერლინი-კიევის ღერძის მიერ მიღებული გადაწყვეტილების გამო, რომელიც შეთანხმებული იყო პარტია „ტისასთან“. ეს არის პრეზიდენტ ზელენსკის მიერ უნგრეთის მკვლელობის მცდელობა და ამ მკვლელობის მცდელობაში „ტისას“ პარტია პრეზიდენტ ზელენსკის თანამონაწილეა“, - განაცხადა სიიარტომ.

უნგრელმა მინისტრმა აღნიშნა, რომ „ბრიუსელი-ბერლინი-კიევის ღერძს“ სურს, არჩევნებამდე უნგრეთში ბენზინის ფასმა 1000 ფორინტს (2.60 ევროს) მიაღწიოს.

„ეს გადაწყვეტილება ბრიუსელ-ბერლინ-კიევის ღერძმა მიიღო პარტია „ტისას“ ინტერესებიდან გამომდინარე, რათა მას ხელისუფლებაში მოსვლაში დაეხმაროს“, - განაცხადა სიიარტომ.