ჩინეთის პრეზიდენტმა სი ძინპინმა ახლო აღმოსავლეთის ქვეყნებს მოუწოდა, წინააღმდეგობა გაუწიონ „გარე ჩარევას“ და განაცხადა, რომ პეკინი მზადაა, ითანამშრომლოს რეგიონის სახელმწიფოებთან საზღვაო გადაზიდვების დასაცავად, რაც აშშ-ირანის ომმა საფრთხის ქვეშ დააყენა. ამის შესახებ სი ძინპინმა კაიროში ეგვიპტელ კოლეგასთან აბდულ-ფათაჰ ალ-სისითან შეხვედრაზე განაცხადა. 

„ჩვენ უნდა დავიცვათ პრინციპი, რომ ახლო აღმოსავლეთის ხალხები თავიანთი საქმეების ბატონ-პატრონები არიან, დავუპირისპირდეთ გარე ჩარევას და მხარი დავუჭიროთ რეგიონის ქვეყნებს მშვიდობისა და უსაფრთხოების შესახებ დიალოგის გაძლიერებაში“, - განაცხადა სი ძინპინმა სისისთან შეხვედრაზე, იტყობინება ჩინეთის სახელმწიფო საინფორმაციო სააგენტო Xinhua.

ეგვიპტის პრეზიდენტის ადმინისტრაციის ცნობით, სი ძინპინისა და სისის მოლაპარაკებების მთავარი თემა აშშ-ირანის კონფლიქტი იყო. ორივე ლიდერმა ხაზი გაუსვა „დიპლომატიური გადაწყვეტილებებისა“ და „ომის დასრულების შესახებ ყოვლისმომცველი შეთანხმების“ მიღწევის მნიშვნელობას. 

სისის ადმინისტრაციის ინფორმაციით, ორმა ქვეყანამ ხელი მოაწერა შეთანხმებას სუეცის არხთან ეგვიპტე-ჩინეთის ინდუსტრიული ზონის მესამე ფაზის დაწყების შესახებ, რომელიც, ოფიციალური პირების თქმით, უკვე მასპინძლობს 200 კომპანიას და დაახლოებით 4 მილიარდი დოლარის ინვესტიციებს.

სი ძინპინის თქმით, ჩინეთი „მზადაა, ითანამშრომლოს რეგიონის ქვეყნებთან საერთაშორისო საზღვაო მარშრუტების უსაფრთხოების დასაცავად, განვითარების სფეროში თანამშრომლობის გასაძლიერებლად და კონფლიქტის წარმოშობის საფუძვლების აღმოსაფხვრელად“.