19 დეკემბრის საღამოს რუსეთის არმიამ ოდესის ოლქის პორტის ინფრასტრუქტურაზე ბალისტიკური რაკეტებით დარტყმა განახორციელა. რვა ადამიანი დაიღუპა და თითქმის სამი ათეული დაშავდა, იტყობინება ოდესის ოლქის სახელმწიფო საგანგებო სიტუაციების სამსახურის მთავარი დირექტორატის პრესსამსახური.

„ოდესის ოლქში მტრის თავდასხმას რვა ადამიანის სიცოცხლე შეეწირა, ხოლო კიდევ 27 ადამიანი დაშავდა. ზოგიერთი მათგანი ავტობუსში იმყოფებოდა, რომელიც დარტყმის ეპიცენტრში აღმოჩნდა“, - განაცხადეს მაშველებმა.

მათი თქმით, ავტოსადგომზე სატვირთო მანქანებს ცეცხლი გაუჩნდა და მსუბუქი ავტომობილებიც დაზიანდა. საგანგებო სიტუაციების სამსახურის ცნობით, ყველა ხანძარი სწრაფად ჩააქრეს.

ოდესის ოლქის პროკურატურის პრესსამსახურის ცნობით, დაიწყო წინასწარი გამოძიება ომის დანაშაულის ჩადენის ფაქტზე, რამაც ადამიანების სიკვდილი გამოიწვია. წინასწარი მონაცემებით, დაღუპულები 20-დან 62 წლამდე ასაკის ადამიანები არიან.