რუმინეთი საშუალოვადიან პერსპექტივაში თავის ტერიტორიაზე ბირთვულ კომპონენტებს არ განათავსებს, განაცხადა ქვეყნის პრეზიდენტმა ნიკუსორ დანმა საფრანგეთის გეგმების საპასუხოდ, გააფართოოს ბირთვული შეკავება და ამ მხრივ ევროპელ პარტნიორებთან ითანამშრომლოს. 

ამ კვირის დასაწყისში საფრანგეთის პრეზიდენტმა ემანუელ მაკრონმა განაცხადა, რომ საფრანგეთი თავის ბირთვულ არსენალს გააფართოებს და ევროპელ პარტნიორებს პოტენციურად საშუალებას მისცემს, ბირთვული შეკავების მისიებში ფრანგული საბრძოლო თვითმფრინავები განათავსონ.

საფრანგეთმა და გერმანიამ შეკავების საკითხების განსახილველად ბირთვული იარაღის მართვის ჯგუფი შექმნეს და კონკრეტულ თანამშრომლობას წელს დაიწყებენ. მაკრონმა განაცხადა, რომ საბერძნეთს, პოლონეთს, ნიდერლანდებს, ბელგიას, დანიასა და შვედეთს შეუძლიათ, მონაწილეობა მიიღონ საფრანგეთის ბირთვულ სამხედრო წვრთნებში, 3 მარტს კი რუმინეთმა განაცხადა, რომ ისიც მიწვეულია მოლაპარაკებებზე.

„როგორც ნატოს წევრი სახელმწიფო, რუმინეთი შეერთებული შტატების მიერ უზრუნველყოფილი ნატოს ბირთვული ქოლგის ქვეშ იმყოფება. ნატოს ქოლგის ქვეშ ყოფნა არ გულისხმობს რუმინეთის ტერიტორიაზე ბირთვული ელემენტების არსებობას და საშუალოვადიან პერსპექტივაში ბირთვული კომპონენტების განთავსება გამორიცხულია“, - განუცხადა დანმა ჟურნალისტებს ვარშავაში ოფიციალური ვიზიტის შემდეგ.