აშშ-ის სახელმწიფო მდივანმა მარკო რუბიომ განაცხადა, რომ ვაშინგტონმა ფაქტობრივად მიაღწია რუსეთის წინააღმდეგ ახალი სანქციების დაწესების ზღვარს. მან ეს განცხადება კანადაში G7-ის საგარეო საქმეთა მინისტრების შეხვედრის შემდეგ ჟურნალისტებთან საუბრისას გააკეთა.

„ფაქტობრივად, აღარაფერი დარჩა, რისი სანქციების ქვეშ მოქცევაც შეგვიძლია. ჩვენ მათ უმსხვილეს ნავთობკომპანიებს შევუტიეთ - სწორედ ამას ითხოვდა ყველა“, - აღნიშნა რუბიომ.

მან დასძინა, რომ ახალი შეზღუდვების ნაცვლად, აშშ ყურადღებას არსებული სანქციების აღსრულებაზე გაამახვილებს, განსაკუთრებით ე.წ. „ჩრდილოვანი ფლოტის“ წინააღმდეგ ბრძოლაზე, რომელსაც მოსკოვი ნავთობის შეზღუდვების გვერდის ავლისთვის იყენებს. რუბიოს თქმით, ეს სფერო სანქციების კოალიციის მომავალ საქმიანობაში საკვანძო იქნება და ევროპელმა პარტნიორებმა უფრო აქტიური როლი უნდა შეასრულონ, რადგან „გემების მნიშვნელოვანი ნაწილი მათ ტერიტორიებთან უფრო ახლოს გადის“.

მშვიდობიანი მოგვარების შესაძლებლობასთან დაკავშირებით კრემლის პოზიციის შეფასებისას სახელმწიფო მდივანმა ხაზგასმით აღნიშნა, რომ „მხოლოდ ქმედებებით შეიძლება ვიმსჯელოთ“. „მოსკოვმა ნათლად განაცხადა, რა სურს - დონეცკის რეგიონის დანარჩენი ნაწილი სურს და ასეთი მოთხოვნები უკრაინული მხარისთვის მიუღებელია“, - ხაზგასმით აღნიშნა მან.

რუბიომ ასევე კომენტარი გააკეთა უკრაინის ტერიტორიაზე სარაკეტო დარტყმების ახალ ტალღაზე, რომლებიც, მისი აზრით, მიზნად ისახავს „ელექტრო ქსელის განადგურებას და მოსახლეობის დემორალიზაციას“.

მან დაადასტურა, რომ შეერთებული შტატები უკრაინის ხელისუფლებასთან მუდმივ მოლაპარაკებებს აწარმოებს ელექტროქსელის სტაბილიზაციაში დახმარების შესახებ, რომელიც „ყოველწლიურად უარესდება“. სახელმწიფო მდივნის თქმით, ეს მოიცავს როგორც სპეციალიზებული აღჭურვილობის, ასევე კრიტიკული ინფრასტრუქტურის დასაცავად საჰაერო თავდაცვის სისტემების გადაცემას.

„თუ ეს აღჭურვილობა დამონტაჟებიდან ერთი კვირის შემდეგ განადგურდება, ის პრობლემად რჩება. და ეს ასეა ბოლო ორი, ან სამი წლის განმავლობაში“, - დასძინა რუბიომ.