კრემლის მთავარი მომლაპარაკებელის კირილ დმიტრიევისა და აშშ-ის პრეზიდენტის დონალდ ტრამპის სპეციალური წარმომადგენლის სტივ ვიტკოფის შეხვედრა დღეს, 2 აპრილს, გაიმართება. ამის შესახებ CBS News-ის ჟურნალისტი სარა კუკი სოციალურ ქსელ X-ზე საკუთარ წყაროებზე დაყრდნობით იტყობინება.

მისი თქმით, შეხვედრა თეთრ სახლში გაიმართება.

„სახაზინო დეპარტამენტმა დროებით გააუქმა სანქციები დმიტრიევისთვის, რათა სახელმწიფო დეპარტამენტმა შეძლოს მისთვის აშშ-ში შესასვლელად საჭირო ვიზის გაცემა“, - განაცხადა სარა კუკმა.

მანამდე CNN წყაროებზე დაყრდნობით წერდა, რომ დმიტრიევი შესაძლოა, ვაშინგტონს ამ კვირაში ეწვიოს და აშშ-ის პრეზიდენტის სპეციალურ წარმომადგენელთან სტივ ვიტკოფთან ორმხრივი ურთიერთობების საკითხებზე მოლაპარაკებები გამართოს. 

ცნობისთვის, დმიტრიევი კრემლის ლიდერ ვლადიმერ პუტინთან დაახლოებული პირია და მონაწილეობდა ერ-რიადში გამართულ მოლაპარაკებებში, სადაც რუსი და ამერიკელი ოფიციალური პირები უკრაინაში ომის დასრულებას განიხილავდნენ.