რუსეთის პრეზიდენტმა ვლადიმერ პუტინმა განაცხადა, რომ „ბურევესტნიკის“ ბირთვულ ფრთოსან რაკეტას მსოფლიოში ანალოგი არ აქვს. ეს განცხადება მან გაერთიანებული ძალების ჯგუფის სამეთაურო პუნქტში ვიზიტის დროს გააკეთა.

„მე მაქვს ინდუსტრიის ანგარიში და, ზოგადად, თავდაცვის სამინისტროს შეფასებები ცნობილია. ეს უნიკალური პროდუქტია, რომელიც მსოფლიოში არავის აქვს“, - აღნიშნა პუტინმა.

„კარგად მახსოვს, როდესაც გამოვაცხადეთ, რომ ასეთ იარაღს ვავითარებდით. მაღალკვალიფიციურმა სპეციალისტებმაც კი მითხრეს, რომ, დიახ, ეს კარგი და ღირებული მიზანი იყო, მაგრამ ისტორიულ პერსპექტივაში  განუხორციელებელი. ვიმეორებ, ეს მაღალკვალიფიციური სპეციალისტების აზრი იყო“, - დასძინა მან.

რუსეთის შეიარაღებული ძალების გენერალური შტაბის უფროსმა ვალერი გერასიმოვმა რუსეთის ლიდერს მოახსენა, რომ 21 ოქტომბერს ჩატარებული ტესტირების დროს „ბურევესტნიკი“ ჰაერში დაახლოებით 15 საათის განმავლობაში იმყოფებოდა და 14 000 კილომეტრის მანძილი დაფარა. გერასიმოვმა აღნიშნა, რომ „ეს ლიმიტი არ არის“.

რაკეტის შემუშავება მას შემდეგ დაიწყო, რაც აშშ 2001 წლის დეკემბერში 1972 წელს დადებული ანტიბალისტიკური რაკეტების შესახებ ხელშეკრულებიდან გავიდა. რუსეთის თავდაცვის სამინისტრომ ხაზი გაუსვა, რომ ახალი სტრატეგიული შეიარაღების სისტემების შექმნა მიზნად ისახავს თავდაცვისუნარიანობის გაძლიერებას და რუსეთისა და მისი მოკავშირეების წინააღმდეგ ნებისმიერი აგრესიის თავიდან აცილებას.