უკრაინის საჰაერო ძალების ყოფილი ოფიცერი, პოლიტოლოგი ანატოლი ხრაპჩინსკი აცხადებს, რომ რუსეთმა პოლონეთზე დრონების იერიშით თავდასხმების მოგერიების უნარი გამოცადა. ამის შესახებ პოლიტოლოგმა ტელეარხ 24-ის ეთერში განაცხადა. 

„დააკვირდით, „შაჰედის“ ტიპის დრონები ქვეყნის რომელი ნაწილებიდან შემოიჭრა. ეს ბელარუსის ტერიტორიის სიახლოვეს იყო, რაც იმაზე მიუთითებს, რომ სავარაუდოდ, ეს მცდელობა იყო პოლონეთის აღმოსავლეთ ფლანგების ასეთი თავდასხმების მოგერიების უნარის შესამოწმებლად“, - თქვა პოლიტოლოგმა. 

ხრაპჩინსკიმ აღნიშნა, რომ ბელარუსი შეიძლება გამოყენებულ იქნეს, როგორც კიდევ ერთი პლატფორმა ევროპის ტერიტორიაზე თავდასხმისთვის.

„ამჟამად ბელარუსის ტერიტორიაზე აქტიურად ვითარდება სხვადასხვა აეროდრომი. აღდგება იარაღის საწყობებიც“, - აცხადებს პოლიტოლოგი. 

მისი თქმით, დისკუსია არ უნდა იყოს უბრალოდ პოლონეთის ცალკეული საზღვრების გაძლიერებაზე საჰაერო თავდაცვის თვალსაზრისით, არამედ „ევროპის ცის ფარის“ ფარგლებში თანამშრომლობის განახლებაზე, რომელიც უკრაინაში მასშტაბური შეჭრის დასაწყისში შეიქმნა.

შეგახსენებთ, 10 სექტემბერს ღამით რუსეთის მიერ უკრაინაზე განხორციელებული მასშტაბური თავდასხმის დროს პოლონეთის საჰაერო სივრცე რამდენიმე დრონმა დაარღვია, რომლებიც ჩამოაგდეს.