ევროკომისიამ მოუწოდა ევროკავშირის დედაქალაქებს, შეამცირონ გაზსა და ელექტროენერგიაზე მოთხოვნა, რათა გლობალური ენერგეტიკული კრიზისის ფონზე ფასები შეინარჩუნონ. იტყობინება Politico.

„შეზღუდული გლობალური მიწოდებისა და ფასების მაღალი ცვალებადობის პირობებში, მოთხოვნის შემცირება შეიძლება ფასების შეკავების ეფექტურ ინსტრუმენტად იქცეს“, - აღნიშნა ენერგეტიკის საკითხებში ევროკომისარმა დან იორგენსენმა.

წერილში იორგენსენი მინისტრებს მოუწოდებს, მიიღონ ზომები გაზსა და ელექტროენერგიაზე მოთხოვნის შესამცირებლად „იმდენ ხანს, რამდენიც საჭირო იქნება“.

ის ამტკიცებს, რომ მიუხედავად იმისა, რომ სიტუაცია რთულია, „ამჟამად მიწოდების უსაფრთხოებას დაუყოვნებლივი საფრთხე არ ემუქრება“.

ევროპაში გაზის მარაგი ამჟამად ისტორიულად დაბალ დონეზეა, რადგან ირანში ომი გაზის გლობალურ ნაკადებს აფერხებს.

იორგენსენის წერილში ნათქვამია, რომ ევროკავშირის ქვეყნების მიერ ფასების რეგულირების მიზნით მიღებული ზომები უნდა იყოს „მიზნობრივი“ და „დროებითი“, რათა თავიდან იქნეს აცილებული მოთხოვნის ზრდა.