სლოვაკეთის პრემიერ-მინისტრმა რობერტ ფიცომ 6 იანვარს პარიზში გამართული „მსურველთა კოალიციის“ შეხვედრა გააკრიტიკა, თუმცა განაცხადა, რომ მას შეუძლია წარმოიდგინოს სლოვაკეთის მონაწილეობა სამშვიდობო შეთანხმების მონიტორინგში, თუ ის მიღწეული იქნება. ამის შესახებ მან Facebook-ზე გამოქვეყნებულ ვიდეომიმართვაში განაცხადა. 

ფიცოს თქმით, თუ ქვეყნების ჯგუფს უკრაინის ტერიტორიაზე ჯარისკაცების გაგზავნა სურს, სლოვაკეთს მათი შეჩერება არ შეუძლია.

„თუმცა, კიდევ ერთხელ ხაზს ვუსვამ, ათასჯერ ვიმეორებ, რომ ჩემი მთავრობის ვადის განმავლობაში არც ერთი სლოვაკი ჯარისკაცი არ გაემგზავრება უკრაინის ტერიტორიაზე, როგორც მრავალეროვნული შეიარაღებული ძალების ნაწილი“, - განაცხადა ფიცომ.

ამავდროულად, მან აღნიშნა, რომ შესაძლებელია სლოვაკეთის მონაწილეობა სამშვიდობო შეთანხმების მონიტორინგში.

„როგორც პრემიერ-მინისტრს, წარმომიდგენია, რომ სლოვაკეთი, როგორც უკრაინის მეზობელი, მონაწილეობას მიიღებს სამშვიდობო შეთანხმების, ან ცეცხლის შეწყვეტის მონიტორინგში, თუ მეომარი მხარეები ამაზე ოდესმე შეთანხმდებიან. რადგან ასეთი შეთანხმებების თავსმოხვევა შეუძლებელია. და ე.წ. „მსურველთა კოალიციის“ გეგმებთან შედარებით, მე ფუნდამენტურად ვამჯობინებ უკრაინასთან ორმხრივ, ურთიერთსასარგებლო თანამშრომლობას, რომელიც დაფუძნებულია ერთობლივ სამთავრობო მოლაპარაკებებზე“, - განაცხადა მან.

ფიცოს თქმით, მიზანია სამოქალაქო თანამშრომლობა, ენერგეტიკული და სატრანსპორტო კავშირები, ელექტროენერგიით, ან გაზით დახმარება და ჰუმანიტარული დახმარება, მაგალითად, განაღმვითი მანქანები.

„მე დროებით უკრაინის ომთან დაკავშირებით გერმანიისა და დიდი ბრიტანეთისგან განსხვავებულ შეხედულებას წარმოვადგენ და არ მჯერა მათი სტრატეგიის. ეს არასწორია. ეს მხოლოდ შემდგომ სისხლისღვრას იწვევს“, - დასძინა ფიცომ.