პაპმა ლეომ განაცხადა, რომ ახლო აღმოსავლეთში ბოლოდროინდელმა კონფლიქტებმა ებრაელებსა და ქრისტიანებს შორის ურთიერთობები გამოცადა. მან დასძინა, რომ მიმდინარე ძალადობის მიმართ განსხვავებულმა შეხედულებებმა დიალოგი დაძაბა, თუმცა არ გაუწყვეტია.

კათოლიკური ეკლესიის მიერ ბოლო 60 წლის განმავლობაში რელიგიათა შორის დიალოგის მიმართულებით გაწეული ძალისხმევის აღსანიშნავ ახალ დადგენილებაში რომის პაპმა კიდევ ერთხელ დაადასტურა ეკლესიის მიერ ანტისემიტიზმისა და ისლამოფობიის დაგმობა.

„ბოლო წლებში ახლო აღმოსავლეთში აალებულმა კონფლიქტებმა ებრაულ-ქრისტიანულ დიალოგზე თავისი კვალი დატოვა“, - ნათქვამია ვატიკანის სამი უმაღლესი უწყების მიერ შემუშავებულ და ლეოს მიერ დამტკიცებულ დოკუმენტში.

„კომუნიკაციის მრავალი არხი დაძაბულობის ქვეშ მოექცა. მიუხედავად ამისა, მორწმუნეთა შორის დიალოგის ის საყრდენები, რომლებიც 60-წლიანი ერთობლივი ძალისხმევით შეიქმნა, მტკიცედ შენარჩუნდა. სწორედ ამ საფუძველზეა შესაძლებელი და აუცილებელი შემდგომი შენება“, - ნათქვამია განცხადებაში. 

დადგენილებაში ანტისემიტიზმის წინააღმდეგ ბრძოლა ებრაელებისა და ქრისტიანების „საერთო ბრძოლად“ არის მოხსენიებული. მასში ასევე აღნიშნულია, რომ ისლამოფობიური განწყობები „ერთმანეთისგან ვერ ასხვავებს“ ექსტრემისტული ძალადობის შემთხვევებსა და მსოფლიოს მუსლიმთა ყოველდღიურ ცხოვრებას.