ისრაელისა და აშშ-ის მიერ ირანის წინააღმდეგ საჰაერო დარტყმების ტალღის დაწყების შემდეგ ისრაელის პრემიერ-მინისტრმა ბენიამინ ნეთანიაჰუმ ებრაულ ენაზე ვიდეომიმართვა გაავრცელა, რომელშიც განაცხადა, რომ ოპერაცია მიმართულია ისლამური რესპუბლიკის მიერ შექმნილი „ეგზისტენციალური საფრთხის მოსაშორებლად“ და ირანელებისთვის „პირობების შესაქმნელად“, რათა მათ საკუთარი ბედი შეცვალონ.

„ჩემო ძმებო და დებო, ისრაელის მოქალაქეებო, ცოტა ხნის წინ ისრაელმა და შეერთებულმა შტატებმა დაიწყეს ოპერაცია ირანში ტერორისტული რეჟიმის მიერ შექმნილი ეგზისტენციალური საფრთხის მოსაშორებლად“, - განაცხადა მან.

„მადლობას ვუხდი ჩვენს დიდ მეგობარს, პრეზიდენტ დონალდ ტრამპს, მისი ისტორიული ლიდერობისთვის“, - დასძინა მან.

„47 წლის განმავლობაში აიათოლას რეჟიმი ყვიროდა „სიკვდილი ისრაელს“ და „სიკვდილი ამერიკას“. მან დაღვარა ჩვენი სისხლი, დახოცა მრავალი ამერიკელი და საკუთარ ხალხს ხოცვა-ჟლეტა მოუწყო“, - განაგრძო ნეთანიაჰუმ.

„ამ მკვლელ ტერორისტულ რეჟიმს არ უნდა მიეცეს უფლება, აღიჭურვოს ბირთვული იარაღით, რაც მას საშუალებას მისცემს, საფრთხე შეუქმნას მთელ კაცობრიობას“, - აღნიშნა მან და დასძინა: „ჩვენი ერთობლივი მოქმედება შექმნის პირობებს მამაცი ირანელი ხალხისთვის, რათა მათ საკუთარი ბედი საკუთარ ხელში აიღონ“.

„დადგა დრო, რომ ირანელი ხალხის ყველა ნაწილმა - სპარსელებმა, ქურთებმა, აზერბაიჯანელებმა, ბელუჯებმა და აჰვაზებმა - მოიშორონ ტირანიის უღელი და შექმნან თავისუფალი და მშვიდობის მაძიებელი ირანი“.

„მოგიწოდებთ თქვენ, ისრაელის მოქალაქეებო, დაიცვათ შიდა ფრონტის სარდლობის მითითებები. უახლოეს დღეებში ოპერაცია „ლომის ღრიალის“ დროს ყველა ჩვენგანს მოთმინებისა და შინაგანი ძალის გამოვლენის ვალდებულება ექნება. ერთად დავდგებით, ერთად ვიბრძოლებთ და ერთად უზრუნველვყოფთ ისრაელის მომავალს“, - აღნიშნა მან.

אחיי ואחיותיי אזרחי ישראל, לפני שעה קלה יצאנו ישראל וארה״ב למבצע להסרת האיום הקיומי מצד משטר הטרור באיראן.

אני מודה לידידינו הגדול הנשיא דונלד טראמפ על מנהיגותו ההיסטורית.

במשך 47 שנים קורא משטר האייתוללות ״מוות לישראל״, ״מוות לאמריקה״. הוא הקיז את דמינו, רצח אמריקנים רבים וטבח… pic.twitter.com/itTF5b4jB4

— Benjamin Netanyahu - בנימין נתניהו (@netanyahu) February 28, 2026