იაპონიის ქალაქ ნაგასაკის მერმა სირო სუზუკიმ მსოფლიოს ბირთვულ იარაღზე უარის თქმისკენ მოუწოდა. ასევე, მისი თქმით, მსოფლიოში ბირთვული ომის საფრთხე გაიზარდა. ეს განცხადება სუზუკიმ 9 აგვისტოს, ატომური ბომბის მსხვერპლთა მოგონების დღეს გააკეთა, რომელიც აშშ-მა ნაგასაკიზე 80 წლის წინ ჩამოაგდო. ინფორმაციას Deutche Welle ავრცელებს. 

„კაცობრიობის ეს ეგზისტენციური კრიზისი ყოველი ჩვენგანისთვის პლანეტაზე უშუალო პრობლემად იქცა“, - განაცხადა ნაგასაკის მერმა.

იაპონელმა ჩინოვნიკმა მოუწოდა მსოფლიოს, რომ ისტორიიდან დასკვნები გამოიტანოს, რათა გარანტია არსებობდეს, რომ ნაგასაკი ბოლო ქალაქია, სადაც ბირთვული კატასტროფა დატრიალდა.

მხოლოდ ნაგასაკიში 1945 წლის 9 აგვისტოს ატომური ბომბის აფეთქების შედეგად 70 000 ადამიანი დაიღუპა და 75 000 დაიჭრა. სამი დღით ადრე აშშ-მა ატომური ბომბით ქალაქი ხიროსიმა გაანადგურა. ხიროსიმაში 100 000-ზე მეტი ადამიანი დაიღუპა.

ხიროსიმა და ნაგასაკი მსოფლიოში ერთადერთი ქალაქებია, რომლებიც ატომური დაბომბვის შედეგად იყო განადგურებული.