პოლონეთში ვიზიტით მყოფმა საფრანგეთის პრეზიდენტმა ემანუელ მაკრონმა ჰორმუზის სრუტის გარშემო ვითარების დეესკალაციის მნიშვნელობაზე ისაუბრა. 

„ჩვენი პოზიცია უცვლელია. ჩვენ უნდა მოვაგვაროთ საკითხები დიპლომატიის გზით. ყველა უნდა დამშვიდდეს“, - განაცხადა მაკრონმა პოლონეთის პრემიერ-მინისტრ დონალდ ტუსკთან ერთად გამართულ პრესკონფერენციაზე.

„სავარაუდოა, რომ ჰორმუზის სრუტეზე მიზანმიმართული ბლოკადის შენარჩუნების შესახებ აშშ-ის მიერ მიღებული გადაწყვეტილების შემდეგ... ირანის ხელისუფლებამ თავდაპირველი პოზიცია შეცვალა... ეს ორივე მხარის შეცდომაა“, - აღნიშნა მან.

ამასთან, მაკრონმა ჟურნალისტებს განუცხადა, რომ 18 აპრილს, როდესაც ირანმა ჰორმუზის სრუტეში გემებს ცეცხლი გაუხსნა, ფრანგული გემები მიზანში არ ამოუღიათ. 

ერთ-ერთი გემი, რომელიც დარტყმების ქვეშ აღმოჩნდა, ფრანგული კომპანია CMA CGM-ის კუთვნილი კონტეინერმზიდი იყო. კომპანიამ განაცხადა, რომ ეკიპაჟმა „გამაფრთხილებელი გასროლის“ შესახებ შეატყობინა. ამავე ცნობით, ბორტზე მყოფი ყველა ადამიანი უსაფრთხოდაა.