საფრანგეთის პრეზიდენტმა ემანუელ მაკრონმა განაცხადა, რომ შეერთებული შტატები თანდათან შორდება ცალკეულ მოკავშირეებს.

„შეერთებული შტატები თანდათან შორდება თავის ზოგიერთ მოკავშირეს და ამავდროულად, თავისუფლდება საერთაშორისო წესებისგან“, - განაცხადა მაკრონმა ელისეის სასახლეში 8 იანვარს საფრანგეთის ელჩებისადმი ყოველწლიური მიმართვის დროს.

საფრანგეთის პრეზიდენტმა ხაზგასმით აღნიშნა, რომ მრავალმხრივი სისტემა კრიზისშია.

„მრავალმხრივი ინსტიტუტები სულ უფრო და უფრო უარესად ფუნქციონირებენ. ჩვენ ვვითარდებით დიდი ძალების სამყაროში, სადაც რეალური ცდუნებაა, რომ მსოფლიო ერთმანეთში გავყოთ“, - განაცხადა მაკრონმა და ასევე ახსენა დიპლომატიურ ურთიერთობებში „ნეოკოლონიალისტური აგრესიის“ აღზევება.

ის ასევე შეეხო ციფრული პოლიტიკის თემას და მოუწოდა ტექნოლოგიური სექტორის ევროპული რეგულირების დაცვასა და გაძლიერებას, რომელიც, მისი თქმით, შეერთებული შტატების ზეწოლის ქვეშაა.

მაკრონმა ასევე გაიხსენა ე.წ. „ევროპული დემოკრატიული ფარის“ მომზადება.

„ევროკომისია ამაზე მუშაობს და საფრანგეთი ამ მიმართულებით ინიციატივების აღებას გააგრძელებს“, - დასძინა მან.

პრეზიდენტმა ასევე მოუწოდა ევროპული სავაჭრო პრეფერენციების დანერგვის დაჩქარებასა და კაპიტალის ერთიანი ბაზრის გამარტივებას, რათა ევროპა „ნამდვილად არსებობდეს და უფრო რეალური იყოს“.