ბრიტანეთის პრემიერ-მინისტრი კირ სტარმერი აცხადებს, რომ ბრიტანელებს აქვთ უფლება, პროტესტი მშვიდობიანი ფორმით გამოხატონ.

აღნიშნული განცხადება სტარმერმა მას შემდეგ გააკეთა, რაც შაბათს ლონდონში ანტიიმიგრაციულ მარშში მონაწილეობა 100 000-ზე მეტმა ადამიანმა მიიღო.

ამავდროულად, პრემიერმა დაგმო პოლიციაზე თავდასხმის შემთხვევები და განაცხადა, რომ ბრიტანეთი ტოლერანტობასა და მრავალფეროვნებაზეა აგებული.

„ხალხს აქვს მშვიდობიანი პროტესტის უფლება. ეს ჩვენი ქვეყნის ღირებულებების განუყოფელი ნაწილია. მაგრამ ჩვენ არ შევეგუებით პოლიციელებზე თავდასხმებს, რომლებიც თავიანთ საქმეს ასრულებენ ან იმ ადამიანებზე, რომლებიც ჩვენს ქუჩებში შიშს გრძნობენ თავიანთი წარმომავლობის ან კანის ფერის გამო“, - დაწერა სტარმერმა X-ზე.

როგორც Reuters წერს, შაბათს ლონდონში ულტრამემარჯვენე აქტივისტის ტომი რობინსონის მიერ ორგანიზებულ დემონსტრაციაში, სულ მცირე, 100 000 ადამიანი მონაწილეობდა. აქციის დროს 25 ადამიანი დააკავეს. დემონსტრანტებსა და პოლიციას შორის დაპირისპირების დროს დაშავდა 26 სამართალდამცველი.

ულტრამემარჯვენე აქტივისტის, ტომი რობინსონის მიერ ორგანიზებული აქციის მონაწილეები ხელისუფლებისგან საიმიგრაციო პოლიტიკის გამკაცრებას ითხოვდნენ. დემონსტრანტებს ვიდეოკავშირის საშუალებით ამერიკელმა მილიარდერმა ილონ მასკმაც მიმართა.

მან „მასობრივ უკონტროლო მიგრაციაზე“ ისაუბრა და დიდ ბრიტანეთში მთავრობის შეცვლისკენ მოუწოდა.

People have a right to peaceful protest. It is core to our country’s values.

But we will not stand for assaults on police officers doing their job or for people feeling intimidated on our streets because of their background or the colour of their skin.

Britain is a nation…

— Keir Starmer (@Keir_Starmer) September 14, 2025