გერმანიის მთავრობის და მისი კანცლერის, ფრიდრიხ მერცის რეიტინგი ყველაზე დაბალ ნიშნულზეა ამჟამინდელი კოალიციური მთავრობის მუშაობის დაწყებიდან. როგორც ინსტიტუტის, infratest dimap-ის მიერ ჩატარებული გამოკითხვა მიუთითებს, მთავრობის საქმიანობით გამოკითხულთა 84 %-ია უკმაყოფილო. ინფორმაციას Deutche Welle ავრცელებს.

ფრიდრიხ მერცის რეიტინგი 8%-ით შემცირდა და 21%-ს შეადგენს. ვიცე-კანცლერის, ლარს კლინგბეილის რეიტინგი კი 18%-მდე დაეცა. ამ პოლიტიკოსებისთვის ეს ყველაზე დაბალი მაჩვენებელია ხელისუფლებაში მოსვლის შემდეგ.

მომდევნო კვირას ბუნდესტაგში არჩევნები რომ გამართულიყო, მმართველი პარტიები იქ უმრავლესობას ვერ მოიპოვებდნენ, ქრისტიან-დემოკრატიული კავშირი და ქრისტიან-სოციალური კავშირი ამომრჩეველთა ხმების 26%-ს მიიღებდა, გერმანიის სოციალ-დემოკრატიულ პარტიას კი 12% მისცემდა ხმას.

ამავდროულად, გერმანიის ულტრამემარჯვენე პარტია „გერმანიის ალტერნატივა“. ამომრჩეველთა ხმების 25%-ს მიიღებდა.

გამოკითხულთა 70%-ს არ სჯერა, რომ ქვეყნის დღევანდელი მთავრობა ეკონომიკური პრობლემების მოგვარებას შეძლებს. 74% ფიქრობს, რომ მერცის მთავრობა სოციალურ სისტემას ვერ შექმნის, რომელიც გრძელვადიანად საზოგადოების ინტერესებს მოემსახურება.