ირანს ომი სხვადასხვა ქვეყანაში გადააქვს და იგივე დრონები, რომლებიც ყოველდღიურად ესხმიან თავს კიევს, ახლა ახლო აღმოსავლეთის სახელმწიფოებსაც უტევენ. ამის შესახებ საგარეო საქმეთა და უსაფრთხოების პოლიტიკის საკითხებში ევროკავშირის უმაღლესმა წარმომადგენელმა კაია კალასმა განაცხადა. 

ევროკავშირის უმაღლესი დონის დიპლომატმა ხაზგასმით აღნიშნა, რომ იგივე ირანული დრონები ახლა უკრაინასა და ახლო აღმოსავლეთს ესხმიან თავს.

„დღეს გვექნება ევროკავშირისა და სპარსეთის ყურის საგარეო საქმეთა მინისტრების რიგგარეშე შეხვედრა. განვიხილავთ ახლო აღმოსავლეთში ამჟამად მიმდინარე მოვლენებს“, - განაცხადა კალასმა.

მან ხაზგასმით აღნიშნა, რომ ირანი ომს აფართოებს, „ცდილობს, ის რაც შეიძლება მეტ ქვეყანაში გაავრცელოს ქაოსის დათესვის მიზნით, ჩვენ კი სტაბილურობისკენ მოვუწოდებთ და განვიხილავთ, თუ რა შეგვიძლია, ერთად გავაკეთოთ“. 

„ახლო აღმოსავლეთში, ფაქტობრივად, ჩვენ ვხედავთ იმავე დრონებს, რომლებიც ყოველდღიურად ესხმიან თავს კიევს, ახლა კი ისინი ახლო აღმოსავლეთს ესხმიან თავს“, - აღნიშნა ევროკავშირის უმაღლესმა დიპლომატმა.

მან კიდევ ერთხელ გაიმეორა, რომ უკრაინას რეალურად შეუძლია დაეხმაროს სპარსეთის ყურის ქვეყნებს, რადგან მან შეიმუშავა დრონებისგან თავდაცვის ეფექტური საშუალებები.

„ამიტომ, ჩვენ შეგვიძლია განვიხილოთ, თუ როგორ გავაერთიანოთ ეს ძალისხმევა, რათა დავეხმაროთ ქვეყნებს დრონებით თავდასხმების მოგერიებაში. ეს არის ჩვენი დღევანდელი განხილვის არსი“, - დაასკვნა კაია კალასმა.