ევროკავშირი კოლუმბიაში მომხდარი 7.4 მაგნიტუდის მიწისძვრის შედეგებზე რეაგირებისთვის თანამგზავრულ სერვისსა და დაფინანსებას გამოყოფს, განაცხადა ბლოკის საგარეო პოლიტიკის ხელმძღვანელმა კაია კალასმა X-ზე გამოქვეყნებულ პოსტში. 

„კოლუმბიაში მომხდარი დამანგრეველი მიწისძვრის გამო, ჩემს კოლუმბიელ კოლეგას ღრმა მწუხარებას ვუცხადებ. ჩვენი ფიქრები მსხვერპლებთან, მათ ოჯახებთან, დაშავებულებთან და ყველა დაზარალებულთანაა“, - დაწერა კალასმა. 

„ევროკავშირმა სამაშველო და დახმარების ოპერაციების მხარდასაჭერად ჩვენი თანამგზავრული მომსახურება — Copernicus-ი ჩართო. ჩვენ უზრუნველვყოფთ დაფინანსებას კრიზისზე რეაგირების მხარდასაჭერად, მათ შორის „წითელი ჯვრის“ მეშვეობით“, — აღნიშნა მან.

კალასის თქმით, ასევე ამოქმედდა ევროკავშირის კრიზისული საკონსულო დახმარების მექანიზმი, რათა მხარი დაუჭირონ მიწისძვრის შედეგად დაზარალებულ ევროკავშირის მოქალაქეებს.

ეს ნიშნავს, რომ ევროკავშირის მოქალაქეებს, რომელთა მშობლიურ ქვეყნებს არ აქვთ დიპლომატიური წარმომადგენლობა კოლუმბიაში, შეუძლიათ, მოითხოვონ დახმარება ქვეყნიდან ევაკუაციაში, ნათქვამია ევროკომისიის ვებსაიტზე.

ბოლო მონაცემებით, კოლუმბიაში 10 აგვისტოს მომხდარი მიწისძვრის შედეგად დაღუპულთა რიცხვი 175-მდე გაიზარდა.