იტალიის საგარეო საქმეთა მინისტრმა ანტონიო ტაიანიმ განაცხადა, რომ ევროპამ უკრაინის სამშვიდობო პროცესში საკუთარი როლი უნდა შეასრულოს. ამის შესახებ მან ბრიუსელში განაცხადა.

იტალიელ მინისტრს სთხოვეს, კომენტარი გაეკეთებინა აშშ-ის მიერ შეთავაზებულ „სამშვიდობო გეგმაზე“, რომელმაც მედიაში გაჟონა და რომელსაც უკრაინისთვის უკიდურესად არახელსაყრელად მიიჩნევენ. 

„ჟურნალისტებისთვის ინფორმაციის გაჟონვაზე კომენტარის გაკეთება რთულია“, - განაცხადა ტაიანიმ ბრიუსელში ევროკავშირის საგარეო საქმეთა მინისტრების შეხვედრაზე მისვლისას.

მან დასძინა, რომ იტალია ყურადღებით გააანალიზებს გეგმას, როდესაც მას წარადგენენ.

„როგორც ყოველთვის ითქვა, ევროპამ უნდა ითამაშოს თავისი როლი [სამშვიდობო პროცესში]. უკრაინა ასევე ევროპის უსაფრთხოების ბარიერია. თუ უკრაინა დაეცემა, ევროპისთვის რისკები გაიზრდება და ჩვენ აბსოლუტურად ვერ მივიღებთ, ან დავუშვებთ ამას“, - განაცხადა იტალიელმა მინისტრმა.

შეგახსენებთ, რომ 19 ნოემბერს რამდენიმე ამერიკულმა მედიასაშუალებამ გაავრცელა ინფორმაცია 28-პუნქტიანი ახალი „სამშვიდობო გეგმის“ შესახებ, რომელსაც ტრამპის გუნდი რუსებთან კონსულტაციით ამუშავებდა.