ისრაელის ჯარებმა სამხრეთ ლიბანში ჯვაროსნების მიერ აშენებული სტრატეგიული მნიშვნელობის ბოფორტის ციხესიმაგრე დაიკავეს, განაცხადეს ისრაელის თავდაცვის ძალებმა მას შემდეგ, რაც ისრაელმა „ჰეზბოლას“ წინააღმდეგ სახმელეთო შეტევა გააფართოვა. ინფორმაციას The Times Of Israel-ი ავრცელებს. 

ისრაელის თავდაცვის ძალების განცხადებით, ბოლო დღეებში მათ ბოფორტის ქედისა და ვადი სალუკის ნაკადულის ტერიტორიაზე სახმელეთო ოპერაცია დაიწყეს, „სამხრეთ ლიბანში ოპერატიული კონტროლის გაძლიერებისა და გალილეის პანჰენდლისა და მეტულასთვის პირდაპირი საფრთხის აღმოფხვრის ფარგლებში [„ჰეზბოლას“] ინფრასტრუქტურის გასანადგურებლად და ტერორისტების აღმოსაფხვრელად“, ასევე, „წინა თავდაცვითი ხაზის გაფართოების მიზნით“.

ჯარისკაცებმა გადაკვეთეს ლიტანის მდინარის 90-გრადუსიანი მოსახვევი მეტულას სასაზღვრო თემის მოპირდაპირე მხარეს და ციხისკენ დაიძრნენ, რომელიც ჩრდილოეთ ისრაელში გალილეის პანჰენდლს და სამხრეთ ლიბანში ნაბატიეს ტერიტორიას გადაჰყურებს.

ისრაელის თავდაცვის ძალების ცნობით, მათ გააფართოვეს დარტყმები ლიტანის მდინარის ჩრდილოეთით მდებარე ტერიტორიებზე და ოპერაცია „ამ დროისთვის სხვა ტერიტორიებზეც ვრცელდება“.

ბოფორტისა და ვადი სალუკის რაიონში მდებარეობს „ჰეზბოლას“ „მნიშვნელოვანი“ ინფრასტრუქტურა, რომელიც, ისრაელის თავდაცვის ძალების თქმით, ირანის დახმარებით შეიქმნა და „საიდანაც „ჰეზბოლას“ ტერორისტები მართავდნენ საბრძოლო მოქმედებებს და ახორციელებდნენ მრავალ ტერორისტულ თავდასხმას“.

სამხედროების ცნობით, ამ ტერიტორიიდან ასობით რაკეტა ისროლეს ისრაელსა და სამხრეთ ლიბანში განლაგებული ჯარების მიმართულებით.

„ისრაელის თავდაცვის ძალები სამხრეთ ლიბანში „ჰეზბოლას“ მნიშვნელოვანი დასაყრდენის, ნაბატიეს მახლობლად მოქმედებს და საჭიროების შემთხვევაში, შეტევის გასაფართოებლად მზადაა“, - აცხადებენ სამხედროები.

სახმელეთო შეტევის დაწყებამდე ისრაელის საჰაერო ძალებმა ამ ტერიტორიაზე არსებულ „ჰეზბოლას“ სამხედრო ინფრასტრუქტურაზე „მასიური“ დარტყმები განახორციელეს.