ისრაელის თავდაცვის ძალების წარმომადგენელმა, ბრიგადის გენერალმა ეფიმ, კიდევ ერთხელ გაიმეორა, რომ ისრაელი ღაზას მშვიდობიან მოსახლეობაზე უფრო მეტად ზრუნავს, ვიდრე „ჰამასი“.

„ჩვენ ვაგრძელებთ ჰუმანიტარული დახმარების მიწოდების პროცესს, ამავდროულად, ვაგრძელებთ საბრძოლო მოქმედებებს. ისრაელმა დაიწყო [ღაზას ჰუმანიტარული ფონდის] დახმარების განაწილების პუნქტების გახსნა... ეს ღაზაში შიმშილის თავიდან ასაცილებლად კეთდება.

გარდა ამისა, ჩვენ გამოვყავით ჰუმანიტარული დერეფნები, რომლებიც გაეროს და შიდა ორგანიზაციების კოლონებს უსაფრთხო გადაადგილებას უზრუნველყოფს. საბრძოლო მოქმედებები ჩერდება, რათა მშვიდობიან მოსახლეობას საშუალება მიეცეს, შეაგროვოს დახმარება“, - განაცხადა დეფრინმა პრესკონფერენციაზე.

დეფრინი ამტკიცებს, რომ „ჰამასი“ ღაზას მოსახლეობისგან დახმარებას იპარავს, გვირაბებში მალავს და ამავდროულად „ღაზას სექტორში შიმშილის ცრუ კამპანიას“ ახორციელებს.

„ღაზადან მოპოვებული ფოტოები რთულია და ისინი ამ ცრუ კამპანიის ნაწილია. ჩვენ საერთაშორისო სამართლის შესაბამისად ვმოქმედებთ, ყოველდღიურად ვაკვირდებით სიტუაციას და შესაბამისად ვმოქმედებთ.

ჩვენ ღაზას მოსახლეობის კვებაზე უფრო ვზრუნავთ, ვიდრე „ჰამასი“. „ჰამასი“ განზრახ ცდილობს მოსახლეობის მდგომარეობის გაუარესებას. „ჰამასი“ ყველანაირად ცდილობს, ხელი შეუშალოს დახმარების განაწილებას და ღაზას სექტორში დახმარების ჩასვლას“, - დასძენს ის.