ისრაელის სამხედროებმა სამხრეთ ლიბანში, ალი ტაჰერის ქედის ქვეშ, „ჰეზბოლას“ გვირაბების მსხვილი სისტემა ააფეთქეს.

ძლიერი აფეთქების ხმა მთელ რეგიონში გაისმა, როდესაც ისრაელის თავდაცვის ძალებმა გორაკის ქვეშ გამავალი ორი გვირაბის მარშრუტი ასაფეთქებელი ნივთიერებებით დაანგრიეს.

ისრაელის პრემიერ-მინისტრმა ბენიამინ ნეთანიაჰუმ და თავდაცვის მინისტრმა ისრაელ კაცმა ერთობლივი განცხადება გამოაქვეყნეს, რომელშიც აღნიშნეს, რომ მიწისქვეშა ობიექტი მათი მითითების შესაბამისად განადგურდა და ისრაელის თავდაცვის ძალებმა „სამხრეთ ლიბანში „უსაფრთხოების ზონის“ ორგანიზება დაასრულეს“.

ისრაელის თავდაცვის ძალების ცნობით, ალი ტაჰერის ქვეშ არსებული გვირაბული სისტემები ტერორისტული დაჯგუფების „ბადრის“ რეგიონული დივიზიის „ნერვულ ცენტრს“ წარმოადგენდა — დანაყოფის, რომლის ამოცანაც სამხრეთ ლიბანის, მდინარე ლიტანის ჩრდილოეთით მდებარე ტერიტორიის მართვაა.

ისრაელის თავდაცვის ძალებმა ობიექტი აღწერეს, როგორც „სტრატეგიული ინფრასტრუქტურა, რომელიც ორი ათწლეულის განმავლობაში შენდებოდა“, აქტივობა, რომელიც, მათი თქმით, ირანის მიერ იყო დაფინანსებული და დაგეგმილი.

„ქედის ქვეშ არსებული ტერორისტული ინფრასტრუქტურა და შტაბ-ბინა ბაზის ფუნქციას ასრულებდა — საიდანაც გალილეის დაპყრობა, ასევე, მეტულასა და კირიათ-შმონაზე თვალთვალი და მათი მიმართულებით ცეცხლის გახსნა იგეგმებოდა“, - ნათქვამია ნეთანიაჰუსა და კაცის განცხადებაში.

გასულ კვირას ისრაელის სამხედროებმა განაცხადეს, რომ დაასრულეს გვირაბების სისტემის დაკავება და გაწმენდა „ჰეზბოლას“ მებრძოლებისგან. მათგან ზოგიერთი მოკლეს, ზოგი კი გაიქცა.

Footage shows the demolition of Hezbollah's tunnels beneath the Ali Taher Ridge in southern Lebanon by the IDF tonight. pic.twitter.com/dpFDSok54n

— Emanuel (Mannie) Fabian (@manniefabian) September 10, 2026