ირანის საგარეო საქმეთა სამინისტროს წარმომადგენელმა ესმაილ ბაღაეიმ განაცხადა, რომ მას „არ შეუძლია, დაადასტუროს“, არიან თუ არა უვნებლად ირანის უმაღლესი ხელმძღვანელობის წევრები, რომლებიც აშშ-ისა და ისრაელის საჰაერო დარტყმების სამიზნეები იყვნენ. 

მანამდე ირანის საგარეო საქმეთა მინისტრმა აბას არაღჩიმ NBC News-ს განუცხადა, რომ, მისი ინფორმაციით, უზენაესი ლიდერი აიათოლა ალი ხამენეი „ცოცხალია“, თუმცა ირანმა „შესაძლოა, ერთი, ან ორი მეთაური დაკარგა“.

ირანის უზენაესი ლიდერის ოფისებსა და რეზიდენციებზე დარტყმების შესახებ ცნობების ფონზე, BBC-იმ ირანის საგარეო უწყების წარმომადგენელს სთხოვა, დაადასტუროს, ან უარყოს ეს ინფორმაცია.

„შემიძლია, გითხრათ, რომ ქვეყნის მასშტაბით ბევრ ადგილას, ბევრ სამიზნეზე დარტყმები განხორციელდა“, - ამბობს ბაღაეი და აცხადებს, რომ 150-ზე მეტი გოგონა მოკლეს და დაასახიჩრეს.

მედიაში გავრცელებული ინფორმაციით, ირანმა სხვა არაბული ქვეყნებიც დაბომბა. ბაღაეი ამბობს, რომ აშშ-მა ეს ქვეყნები ირანის წინააღმდეგ აგრესიული დარტყმების განსახორციელებლად გამოიყენა და დასძენს: „ჩვენ ვაფასებთ ჩვენს მეგობრებს“.

„ჩვენ არ ვესხმით თავს რეგიონში არცერთ ქვეყანას, ჩვენ არ გვაქვს პრობლემა ჩვენს არაბ მეზობლებთან. ერთადერთი, რასაც ვაკეთებთ, არის თავდაცვის აქტის განხორციელება ამ [ამერიკული] ბაზებზე“, - ამბობს ის.