ირანის საგარეო საქმეთა მინისტრმა აბას არაღჩიმ უკრაინელ კოლეგასთან ანდრეი სიბიგასთან საუბრის შემდეგ განაცხადა, რომ უკრაინამ კასპიის ზღვაში ირანული კომერციული გემის ჩაძირვით მიყენებული ზარალი უნდა აანაზღაუროს. 

„უკრაინის საგარეო საქმეთა მინისტრმა, ანდრეი სიბიგამ დამარწმუნა, რომ ირანულ გემზე თავდასხმა განზრახ არ მომხდარა და უკრაინა ესკალაციას არ ცდილობს. ესკალაცია არც ირანის ინტერესებშია, თუმცა მკაფიოდ აღვნიშნეთ, რომ ჩვენს მოქალაქეებსა თუ ინტერესებზე ნებისმიერი თავდასხმა მიუღებელია. მიყენებული ზარალი აუცილებლად უნდა ანაზღაურდეს“, - აღნიშნა არაღჩიმ. 

Was assured by Ukrainian FM @andrii_sybiha that the attack on an Iranian ship was unintentional and Ukraine seeks no escalation.

Iran does not seek escalation either, but made clear any attack on our citizens or interests is unacceptable. There must be restitution for losses.

— Seyed Abbas Araghchi (@araghchi) July 28, 2026

ინფორმაციისთვის, ირანის საგარეო საქმეთა სამინისტროს განცხადებით, ირანულ სავაჭრო გემზე კასპიის ზღვაში 26 ივლისს, დილით თავდასხმა განხორციელდა.

ინციდენტის შედეგად ერთი მეზღვაური დაიღუპა, ხოლო კიდევ ერთი დაშავდა.

თეირანის განცხადებით, ეს თავდასხმა უკრაინის მხრიდან ირანის მიმართ „არარაციონალურ და მტრულ დამოკიდებულებას“ გამოხატავს.

26 ივლისს უკრაინის პრეზიდენტმა ვოლოდიმირ ზელენსკიმ, უკრაინის სამხედრო ძალების მიერ განხორციელებული ბოლო დარტყმების კომენტირებისას, სხვა საკითხებთან ერთად აღნიშნა, რომ „ირანიდან სამხედრო ტვირთის გადაზიდვაში ჩართულ გემებზე იერიში მიიტანეს“.