Guardian: რატომ უნდა გამოიყენოს ევროპამ ნატო საკუთარი მიზნებისთვის?
რატომ უნდა გამოიყენოს ევროპამ ნატო საკუთარი მიზნებისთვის? - ამის შესახებ სტატიას „გარდიანი“ ავრცელებს.
სტატიის ავტორი პოლ ტეილორი წერს, რომ ნატოს წლევანდელ სამიტზე, როგორც დიპლომატები ამბობენ, ნაცვლად ტრადიციული ყოვლისმომცველი კომუნიკესი, იქნება მოკლე განცხადება და „ვიდრე ლიდერები გაიხსენებენ თავიანთ წარსულ დეკლარაციებს, არ იქნება მკაფიო ხსენება ნატოს დაპირების, რომ უკრაინა და საქართველო ერთ დღეს გახდებიან წევრები, რისი წინააღმდეგიცაა ტრამპი. ჯერ კიდევ შარშან აშშ, ჯო ბაიდენის ხელმძღვანელობით, ხელს აწერდა განცხადებებს, რომ უკრაინის გზა ნატოსკენ „გარდაუვალია“. ტრამპმა ხელის მუხრუჭი ამოსწია“, - ნათქვამია სტატიაში.
სტატიაში აღნიშნულია, რომ „ამ პირფერების მეჯლისზე არც ევროპელ მოკავშირეებს და არც უკრაინის პრეზიდენტს, ვოლოდიმირ ზელენსკის, რომელიც სამიტის ფარგლებში, კულისებში უნდა გამოჩნდეს, შეჯახების სურვილი არ გააჩნიათ“.
სტატიის ავტორი ციტირებს ნატოს პირველ გენერალურ მდივანს, ჰასტინგს ისმაის და წერს, რომ ალიანსის მიზნებია: „შეინარჩუნოს ამერიკა შიგნით, რუსეთი - გარეთ და გერმანია - ჩუმად“.
როგორც სტატიაშია ნათქვამი, ევროპელი ლიდერები ცდილობენ, მიაღწიონ ურთიერთგაგებას ტრამპთან იმის თაობაზე, რომ ვიდრე ისინი აპირებენ, გააძლიერონ თავიანთი შეიარაღებული ძალები და უზრუნველყონ აღმოსავლეთ ფლანგზე მათი განთავსება, აშშ მოულოდნელად არ გაიყვანს კრიტიკულად მნიშვნელოვან ძალებს, ყოველ შემთხვევაში იქამდე, ვიდრე ევროპა მზად იქნება პასუხისმგებლობის ასაღებად, რაც, სტატიის ავტორის აზრით, საჭიროებს 5-დან 10 წლამდე გარდამავალ პერიოდს.
„მაგრამ ევროპელმა ლიდერებმა უნდა გაიაზრონ, რომ ისინი ნასესხები დროით ცხოვრობენ, აშშ-ის უსაფრთხოების ფოკუსი კი დაუნდობლად იცვლება მოწინააღმდეგე ჩინეთის მხარეს. მათ უნდა მიიტაცონ ნატო საკუთარი მიზნებისთვის“, - ნათქვამია სტატიაში.
